ന്യൂദല്‍ഹി: മൗറീഷ്യസിന് ഭാരതം പ്രത്യേക സാമ്പത്തിക പാക്കേജ് പ്രഖ്യാപിച്ചു. പ്രധാനമന്ത്രി നരേന്ദ്ര മോദിയുടെ ക്ഷണപ്രകാരം മൗറീഷ്യസ് പ്രധാനമന്ത്രി ഡോ. നവീന്‍ചന്ദ്ര രാംഗൂലം ഇന്നലെ ഭാരതത്തിലെത്തി. രാംഗൂലവുമായി നടത്തിയ കൂടിക്കാഴ്ചയിലാണ് ഭാരതം നടപ്പാക്കുന്ന പദ്ധതികള്‍ക്കായി 680 ദശലക്ഷം ഡോളറിന്റെ പാക്കേജ് പ്രധാനമന്ത്രി പ്രഖ്യാപിച്ചത്.
സര്‍ സീവൂസാഗുര്‍ രാംഗൂലം നാഷണല്‍ ഹോസ്പിറ്റല്‍ നിര്‍മാണം, ആയുഷ് സെന്റര്‍ ഓഫ് എക്‌സലന്‍സ് വെറ്ററിനറി സ്‌കൂള്‍, മൃഗാശുപത്രി എന്നിവ സ്ഥാപിക്കാനും ഭാരതവും മൗറീഷ്യസും ധാരണയായി. എസ്എസ്ആര്‍ അന്താരാഷ്‌ട്ര വിമാനത്താവളത്തിലെ പുതിയ എടിസി ടവറിന്റെ നിര്‍മാണം, ഹൈവേകളുടെയും റിങ് റോഡുകളുടെയും വികസനം എന്നിവയിലും ഇരു രാജ്യങ്ങളും സഹകരിച്ച് പ്രവര്‍ത്തിക്കും. ഈ പദ്ധതികളുടെ ചെലവ് 440 മില്യണ്‍ യുഎസ് ഡോളര്‍ ആയിരിക്കും. പ്രാദേശിക കറന്‍സികളില്‍ വ്യാപാരം സാധ്യമാക്കാനും
ഭാരതവും മൗറീഷ്യസും ഒരുമിച്ചു പ്രവര്‍ത്തിക്കും. ഊര്‍ജ്ജ പരിവര്‍ത്തനത്തിലും ഭാരതം മൗറീഷ്യസിനെ പിന്തുണയ്‌ക്കുന്നുണ്ട്. 100 ഇലക്ട്രിക് ബസുകള്‍ ഭാരതം വാഗ്ദാനം
ചെയ്തതില്‍ 10 എണ്ണം നല്കി. ബാക്കി അതിവേഗം കൈമാറും. ടാമറിന്‍ഡ് വെള്ളച്ചാട്ടത്തില്‍ 17.5 മെഗാവാട്ട് ഫ്‌ളോട്ടിങ് സോളാര്‍ പവര്‍ പ്ലാന്റ് സ്ഥാപിക്കാനും ഭാരതം പിന്തുണയ്‌ക്കും. ഹൈഡ്രോഗ്രാഫി മേഖലയിലെ സഹകരണം സംബന്ധിച്ചുള്ള കരാറിലും ഇരു രാജ്യങ്ങളും ഒപ്പുവച്ചു.
