തൃശൂര് : കേന്ദ്ര മന്ത്രി സുരേഷ് ഗോപിയുടെ കലുങ്ക് സൗഹാര്ദ്ദ വികസന സംവാദം ജനകീയമായി.പ്രാദേശിക വികസന വിഷയങ്ങള് ജനങ്ങള് കേന്ദ്ര മന്ത്രിക്ക് മുന്നില് അവതരിപ്പിച്ചു. വെള്ളപ്പൊക്കം മുതല് കുടിവെള്ള പ്രശ്നം വരെ വികസന സംവാദത്തില് ചര്ച്ചയായി.
കലുങ്ക് സൗഹൃദ വികസന സംവാദം ആദ്യം നടന്നത് പുള്ള് മേഖലയിലാണ്. തുടര്ച്ചയായി ഉണ്ടാകുന്ന വെള്ളപ്പൊക്ക വിഷയവും കുടിവെള്ള പ്രശ്നങ്ങളും കേന്ദ്ര മന്ത്രിക്ക് മുന്നില് നാട്ടുകാര് അവതരിപ്പിച്ചു. വെള്ളപ്പൊക്കത്തിന് ശാശ്വത പരിഹാരം കാണുന്നതിനുവേണ്ടി പ്രത്യേക പഠന സംഘത്തെ നിയോഗിച്ചിട്ടുണ്ടെന്നും സുരേഷ് ഗോപി പറഞ്ഞു. കമാന്ഡോ മുഖം ബണ്ട് അടക്കമുള്ള വിഷയങ്ങളില് ക്രിയാത്മകമായുള്ള ഇടപെടല് ഉണ്ടാകുമെന്നും ജനങ്ങള്ക്ക് കേന്ദ്രമന്ത്രി ഉറപ്പ് നല്കി.
ചെമ്മാപ്പിള്ളിയില് നടന്ന രണ്ടാമത്തെ സൗഹൃദ സംവാദ സദസില് കേന്ദ്ര മന്ത്രി സുരേഷ് ഗോപിക്കൊപ്പം വേദി പങ്കിട്ടത് സിനിമാ സംവിധായകന് സത്യന് അന്തിക്കാട്. ജാതിമത കക്ഷി രാഷ്ട്രീയ വ്യത്യാസമില്ലാതെ എല്ലാവര്ക്കും അവരവരുടെ പ്രശ്നങ്ങള് പങ്കുവയ്ക്കാന് സുരേഷ് ഗോപി ഒരുക്കിയ വേദി പുതുചരിത്രം സൃഷ്ടിക്കുമെന്ന് അദ്ദേഹം പറഞ്ഞു. സുരേഷ് ഗോപി രാഷ്ട്രീയ ഭേദമില്ലാതെ എല്ലാവരുടേയും എംപിയാണെന്നുംസത്യന് അന്തിക്കാട് പറഞ്ഞു
.ബിജെപി നേതാവും ചലച്ചിത്ര താരവുമായ ദേവന്, ബിജെപി സംസ്ഥാന സെക്രട്ടറി എം വി ഗോപകുമാര്, ബിജെപി എറണാകുളം മേഖലാ പ്രസിഡന്റ് എ. നാഗേഷ്, മേഖലാ വൈസ് പ്രസിഡന്റ് ബിജോയ് തോമസ്, ബിജെപി തൃശശ്ശൂര് സിറ്റി ജില്ലാ അധ്യക്ഷന് ജസ്റ്റിന് ജേക്കബ്, ബിജെപി ജില്ലാ ജനറല് സെക്രട്ടറി അഡ്വ. കെ.ആര്. ഹരി, പി കെ ബാബു തുടങ്ങിയവര് പങ്കെടുത്തു.
