തിരുവനന്തപുരം: ആഗോള അയ്യപ്പ സംഗമത്തിലൂടെ പൂങ്കാവനത്ത് ഉയരാന് പോകുന്നത് പഞ്ചനക്ഷത്ര ഹോട്ടലുകള്. പൂങ്കാവനത്തിന്റ പരിസര പ്രദേശങ്ങള് ആഗോള ഹോട്ടല് ശൃംഖലകളുടെ പിടിയിലാകും.
അയ്യപ്പ സംഗമമെന്ന പേരില് ആഗോള അയ്യപ്പ നിക്ഷേപ സംഗമമാണ് നടക്കുന്നത്. 1500 കോടിയുടെ നിക്ഷേപം സര്ക്കാര് പ്രതീക്ഷിക്കുന്നു. ഇതില് പമ്പ, സന്നിധാനം, നിലയ്ക്കല്, എരുമേലി എന്നിവിടങ്ങളില് അയ്യപ്പന്മാരുമായി ബന്ധപ്പെട്ട അടിസ്ഥാന വികസനങ്ങളില്ല. പകരം ഹോട്ടല് വ്യാപാര ശൃംഖലകള്ക്ക് പണമിറക്കി അയ്യപ്പന്മാരെ പിഴിയാനുള്ള അവസരമൊരുക്കുകയാണ്. പുതിയ ഭൂപതിവുചട്ടം പ്രാബല്യത്തിലായാല് നിലവിലെ അനധികൃത കെട്ടിടങ്ങള് ഫീസ് ഈടാക്കി ക്രമവത്കരിച്ചു നല്കാന് തീരുമാനിച്ചിട്ടുണ്ട്. ടൂറിസം സാധ്യത നിലനിര്ത്തി കെട്ടിടങ്ങള് പണിയാനും അവസരം ലഭിക്കും.
എരുമേലി, പ്ലാപ്പള്ളി, വണ്ടിപ്പെരിയാര് എന്നിവിടങ്ങളില് പഞ്ചനക്ഷത്ര ഹോട്ടലുകള് ഉയരും. പ്ലാപ്പള്ളിയില് ഹാരിസണ് എസ്റ്റേറ്റ് വക ഭൂമിയാണ് ഉദ്ദേശിക്കുന്നത്. സര്ക്കാര് ഭൂമി കുത്തകകള്ക്ക് പാട്ടത്തിന് നല്കിയാണ് ഹോട്ടലുകള് കെട്ടുക. ഹോട്ടലുകളില് ഹെലിക്കോപ്റ്റര് ഇറങ്ങുന്ന സംവിധാനം വരെ ഉണ്ടാകും. വിദേശങ്ങളില് നിന്ന് സന്നിധാനത്തേക്ക് അയ്യപ്പന്മാരെ ചാര്ട്ട് ചെയ്തായിരിക്കും കൊണ്ടുവരിക. കോവളം, കുമരകം, തുടങ്ങിയ വിനോദ സഞ്ചാര കേന്ദ്രങ്ങള് പാക്കേജില് ഉള്പ്പെടുത്തും.
