തിരുവനന്തപുരം: ശബരിമലയേയും തിരുവിതാംകൂര് ദേവസ്വം ബോര്ഡിനേയും ശബരിമല തന്ത്രിമാരെയും താഴ്ത്തിക്കെട്ടി സമൂഹത്തില് ചര്ച്ച ചെയ്യുന്നതിലൂടെ ശബരിമലയെ തകര്ക്കാനുള്ള നീക്കമാണ് നടക്കുന്നതെന്ന് തന്ത്രി സമാജം വിലയിരുത്തി.
ബോര്ഡിന്റെ 1200 ഓളം ക്ഷേത്രങ്ങളില് നിത്യനിദാനം നടത്തി വരുന്നത് ശബരിമലയെ ആശ്രയിച്ചാണ്. ശബരിമല തകര്ക്കപ്പെട്ടാല് ബോര്ഡിന്റെ നിലനില്പ്പിനെ തന്നെ ബാധിക്കും. അതിനാല് അത്തരത്തിലുള്ള പ്രസ്താവനകള് അയ്യപ്പഭക്തരെ വേദനിപ്പിക്കുന്നതാണെന്ന് തന്ത്രിസമാജം വിലയിരുത്തി.
ശബരിമല തന്ത്രി സ്ഥാനം നിലവില് പാരമ്പര്യമായി കൈമാറി വരുന്നതാണ്. ഇതിനെപ്പറ്റി പല വിചാരണ നടത്തിയപ്പോള് കോടതി വ്യക്തമായി പരാമര്ശം നടത്തിയിട്ടുള്ളതുമാണ്. ആകയാല് ആ ഉന്നത പദവിയെ പറ്റിയും ശബരിമല മേല്ശാന്തി എന്ന പദവിയെ സംബന്ധിച്ചും സമൂഹത്തില് വ്യാജവാര്ത്തകള് ചമച്ചുവിടുന്നത് ലോകമെമ്പാടുമുള്ള അയ്യപ്പ വിശ്വാസത്തെ തകര്ക്കാനാണ്. ഇത്തരത്തിലുള്ള പ്രസ്താവനകള് നടത്തുന്നവര്ക്കെതിരെ നിയമപരമായ നടപടി കൈക്കൊള്ളണമെന്ന് ആവശ്യപ്പെട്ട് ദേവസ്വം മന്ത്രി കെ. മുരളീധരന് സമാജം പാസാക്കിയ പ്രമേയം കൈമാറി.
മേല്ശാന്തി സമാജം പ്രസിഡന്റ് പുതുമന മനു നമ്പൂതിരി അധ്യക്ഷത വഹിച്ചു. സെക്രട്ടറി മാടവന പരമേശ്വരന് നമ്പൂതിരി പ്രമേയം അവതരിപ്പിച്ചു. എക്സി. കമ്മിറ്റി അംഗങ്ങളായ ട്രഷറര് ഇടമന ദാമോദരന് പോറ്റി, ആറ്റുകാല് ഈശ്വരന് നമ്പൂതിരി, നെയ്യാറ്റിന്കര ഗോവിന്ദന് പോറ്റി, ധനഞ്ജയന് നമ്പൂതിരി, ഗോശാല വിഷ്ണു വാസുദേവന്, ശ്രീവത്സ ശര്മ, കാരിക്കോട് ഉണ്ണികൃഷ്ണന് നമ്പൂതിരി, വൈക്കം രാജീവ് നമ്പൂതിരി, ഏറ്റുമാനൂര് കൃഷ്ണന് നമ്പൂതിരി, നെടുമുടി നാരായണന് നമ്പൂതിരി, വൈക്കം മുരളീധരന് നമ്പൂതിരി, രക്ഷാധികാരികളായ എഴിക്കോട് ശശി നമ്പൂതിരി, കണ്ടിയൂര് നിലമന ഗോവിന്ദന് നമ്പൂതിരി തുടങ്ങിയവര് പങ്കെടുത്തു. പുതുമന മനു നമ്പൂതിരി, ആറ്റുകാല് ഈശ്വരന് നമ്പൂതിരി എന്നിവര് ചേര്ന്ന് മന്ത്രിക്ക് പ്രമേയം സമര്പ്പിച്ചു.
