ന്യൂദല്‍ഹി: ഗൂഢ രാഷ്‌ട്രീയ അജണ്ടയുടെ ഭാഗമായി മോദി സര്‍ക്കാരിനെ വിമര്‍ശിക്കുന്ന കോണ്‍ഗ്രസ് നേതാവ് പവന്‍ ഖേരയ്ക്ക് ഇരട്ടവോട്ട്. ആരോപണം ഉയര്‍ന്നതോടെ പവന്‍ ഖേരയ്ക്ക് തെരഞ്ഞെടുപ്പ് കമ്മീഷന്‍ വിശദീകരണം ചോദിച്ച് നോട്ടീസയച്ചു.
രണ്ട് മണ്ഡലങ്ങളില്‍ രജിസ്റ്റര്‍ ചെയ്ത രണ്ട് വോട്ടര്‍ ഐഡി പവന്‍ ഖേര കൈവശം വെച്ചിട്ടുണ്ട്. ഇത് തെരഞ്ഞെടുപ്പ് നിയമത്തിന്റെ ലംഘനമാണ്. ഇതിനാണ് തെരഞ്ഞെടുപ്പ് കമ്മീഷന്‍ വിശദീകരണം ചോദിച്ചിരിക്കുന്നത്.
ബിജെപി ഐടി സെല്‍ മേധാവി അമിത് മാളവ്യ നേരത്തെ പവന്‍ ഖേരയ്ക്ക് രണ്ട് വോട്ടര്‍ ഐഡി ഉണ്ടെന്ന് ആരോപിച്ചിരുന്നു. ഒരു വോട്ട് കിഴക്കന്‍ ദല്‍ഹിയിലെ ജാംഗ്പുര മണ്ഡലത്തിലാണെങ്കില്‍ മറ്റൊരു വോട്ടര്‍ ഐഡി ദല്‍ഹിയിലാണ്.
ന്യൂദല്‍ഹി ജില്ല ഇലക്ഷന്‍ ഓഫീസാണ് നോട്ടീസ് അയച്ചിരിക്കുന്നത്. ജനപ്രാതിനിധ്യ നിയമമനുസരിച്ചാണ് നോട്ടീസ് അയച്ചിരിക്കുന്നത്. സെപ്തംബര്‍ എട്ടിനകം പവന്‍ ഖേര ഈ ആരോപണത്തിന് മറുപടി നല്‍കണം.
ബീഹാറില്‍ തെരഞ്ഞെടുപ്പ് കമ്മീഷന്‍ വോട്ടര്‍പട്ടികയെ പ്രത്യേക തീവ്ര പുനപരിശോധനയ്‌ക്ക് വിധേയമാക്കിയപ്പോള്‍ 60 ലക്ഷത്തിലധികം വ്യാജവോട്ടുകള്‍ കണ്ടെത്തിയിരുന്നു. ബംഗ്ലാദേശ്, മ്യാന്‍മര്‍, നേപ്പാള്‍ എന്നിവിടങ്ങളില്‍ നിന്നും നുഴഞ്ഞു കയറിയ വോട്ടര്‍മാര്‍, ഇരട്ടവോട്ടുള്ളവര്‍, മേല്‍വിലാസം കണ്ടെത്താന്‍ കഴിയാത്തവര്‍, വ്യാജരേഖകള്‍ ഉള്ളവര്‍ തുടങ്ങിയാണ് 60 ലക്ഷത്തോളം സംശയകരമായ വോട്ടര്‍മാരെ തെരഞ്ഞെടുപ്പ് കമ്മീഷന്‍ കണ്ടെത്തിയത്. ഇതോടെയാണ് രാഹുല്‍ ഗാന്ധിയും തേജസ്വി യാദവും തെരഞ്ഞെടുപ്പ് കമ്മീഷന്‍ വോട്ട് മോഷ്ടിക്കുകയാണെന്ന ആരോപണവുമായി രംഗത്തെത്തിയത്. ഈ വിവാദം ഇപ്പോള്‍ സുപ്രീംകോടതിയില്‍ ആണ്.
സുപ്രീംകോടതിയില്‍ രാഹുല്‍ ഗാന്ധിയുടെയും തേജസ്വി യാദവിന്റെയും കോണ്‍ഗ്രസിന്റെയും വാദമുഖങ്ങള്‍ക്ക് വിചാരണഘട്ടത്തില്‍ തിരിച്ചടി കിട്ടിക്കൊണ്ടിരിക്കുകയാണ്. മിക്കവാറും തെരഞ്ഞെടുപ്പ് കമ്മീഷന്റെ വാദമുഖങ്ങള്‍ സുപ്രീംകോടതി അംഗീകരിക്കാനാണ് സാധ്യത. അന്തിമ വിധി വന്നാല്‍ രാഹുല്‍ ഗാന്ധിയ്‌ക്കും കോണ്‍ഗ്രസിനും മുഖം നഷ്ടമായേക്കും.
അതിനിടെയാണ് മുതിര്‍ന്ന കോണ്‍ഗ്രസ് നേതാവായ പവന്‍ ഖേരയ്ക്ക് തന്നെ ഇരട്ടവോട്ടുള്ളതായി വെളിപ്പെട്ടിരിക്കുന്നത്. ഇപ്പോള്‍ താന്‍ ഒരു വോട്ടര്‍ ഐഡി റദ്ദാക്കാന്‍ ആവശ്യപ്പെട്ട അപേക്ഷനല്‍കിയിരുന്നു എന്ന മറുപടിയുമായി രംഗത്തെത്തിയിരിക്കുകയാണ് പവന്‍ ഖേര.
ഹിന്‍ഡന്‍ ബര്‍ഗ് റിസര്‍ച്ച് വ്യാജആരോപണത്തിലൂടെ അദാനിയെ വേട്ടയാടിയപ്പോള്‍ കുറഞ്ഞത് 20 തവണയെങ്കിലും അദാനിയെ കുറ്റപ്പെടുത്തിക്കൊണ്ട് വാര്‍ത്താസമ്മേളനം നടത്തിയ നേതാവാണ് പവന്‍ഖേര. എന്നാല്‍ അദ്ദേഹം ഉയര്‍ത്തിയ ആരോപണങ്ങളെല്ലാം വ്യാജമാണെന്ന് പിന്നീട് കണ്ടുപിടിക്കപ്പെട്ടു. എന്നിട്ടും മാപ്പ് പറയാതെ വീണ്ടും ആരോപണങ്ങളുമായി വന്നിട്ടുള്ള നേതാവാണ് പവന്‍ഖേര. ഗാന്ധി കുടുംബത്തിന്റെ അടുത്ത പിണിയാളാണ് പവന്‍ ഖേര.
