തൃശൂര്‍ :തൃശൂരില്‍ വോട്ട് അട്ടിമറി എന്ന രാഷ്‌ട്രീയ ആരോപണമുന്നയിച്ച് യൂത്ത് കോണ്‍ഗ്രസ് നടത്താനിരുന്ന ലോംഗ് മാര്‍ച്ച് ഗത്യന്തരമില്ലാതെ മാറ്റിവെച്ചു.വെളളിയാഴ്ച നടക്കേണ്ടിയിരുന്ന ലോംഗ് മാര്‍ച്ചിന്റെ ഉദ്ഘാടകന്‍ രാഹുല്‍ മാങ്കൂട്ടത്തിലായിരുന്നു.യുവനടിയുടെ അശ്ലീല സന്ദേശ ആരോപണത്തിന്റെ പശ്ചാത്തലത്തിലാണ് പരിപാടി മാറ്റിവെച്ചത്.
ഉദ്ഘാടകനെ കുറിച്ച് അന്തിമ തീരുമാനം ഉണ്ടായിരുന്നില്ല എന്നാണ് യൂത്ത് കോണ്‍ഗ്രസിന്റെ ഔദ്യോഗിക വിശദീകരണം.അതേസമയം പാലക്കാട് നഗരസഭ വെളളിയാഴ്ചത്തെ പരിപാടിയില്‍ നിന്ന് രാഹുല്‍ മാങ്കൂട്ടത്തിലിനെ ഒഴിവാക്കി .ബസ്റ്റാന്‍ഡ് ഉദ്ഘാടന പരിപാടിയില്‍ നിന്നാണ് ഒഴിവാക്കിയത്.പരിപാടിയില്‍ മുഖ്യാതിഥിയായിരുന്നു രാഹുല്‍ മാങ്കൂട്ടത്തില്‍.
രാഹുലിന് ഇതുമായി ബന്ധപ്പെട്ട് നഗരസഭ കത്ത് നല്‍കി.രാഹുലിനെതിരെ ആരോപണങ്ങള്‍ ഉയര്‍ന്നതിനാലും പ്രതിഷേധം കണക്കിലെടുത്തുമാണ് നഗരസഭയുടെ തീരുമാനം.
അതേസമയം, രാഹുല്‍ മാങ്കൂട്ടത്തില്‍ എംഎല്‍എ സ്ഥാനവും രാജിവയ്‌ക്കണമെന്ന് ആവശ്യപ്പെട്ട് സംസ്ഥാനത്തൊട്ടാകെ രാഷ്‌ട്രീയ, യുവജന സംഘടനകള്‍ സമരം നടത്തുകയാണ്. അതിനിടെ, രാഹുല്‍ മാങ്കൂട്ടത്തിലിനെതിരെ കേസ് എടുക്കണമെന്നാവശ്യപ്പെട്ട് എറണാകുളം സ്വദേശിയും സിപിഎം അനുഭാവിയുമായ അഭിഭാഷകന്‍ ഷിന്റോ സെബാസ്റ്റ്യന്‍ എറണാകുളം സെന്‍ട്രല്‍ പൊലീസ് സ്റ്റേഷനില്‍ പരാതി നല്‍കി.
