കൊച്ചി: പറവൂര്‍ കോട്ടുവള്ളിയില്‍ പലിശക്കാരിയുടെ ഭീഷണിയെ തുടര്‍ന്ന് വീട്ടമ്മ ജീവനൊടുക്കിയ സംഭവത്തില്‍ ആത്മഹത്യാപ്രേരണയ്‌ക്ക് പൊലീസ് കേസെടുത്തു.പുഴയില്‍ ചാടി മരിച്ച ആശയുടെ ആത്മഹത്യ കുറിപ്പ് പരിഗണിച്ചാണ് റിട്ടയര്‍ഡ് പൊലീസ് ഉദ്യോഗസ്ഥന്‍ പ്രദീപ്കുമാര്‍, ഭാര്യ ബിന്ദു എന്നിവര്‍ക്കെതിരെ കേസെടുത്തത്. ഇവര്‍ ഒളിവിലാണ്.
ആശയും ബിന്ദുവും തമ്മില്‍ നടത്തിയ ലക്ഷങ്ങളുടെ സാമ്പത്തിക ഇടപാടും അന്വേഷിക്കുന്നുണ്ട്. പുളിക്കത്തറ വീട്ടില്‍ ബെന്നിയുടെ ഭാര്യ 46 കാരി ആശ ബെന്നിയെ ഇന്നലെയാണ് കോട്ടുവള്ളി പുഴയില്‍ മരിച്ച നിലയില്‍ കണ്ടെത്തിയത്. റിട്ടയര്‍ഡ് പൊലീസ് ഡ്രൈവറുടെ ഭാര്യ ബിന്ദുവില്‍ നിന്ന് 2022 മുതല്‍ പലതവണയായി പത്ത് ലക്ഷം രൂപ കടം വാങ്ങിയെന്നും ഇതെല്ലാം തിരിച്ചു നല്‍കിയിട്ടും പലിശയും പലിശക്കുമേല്‍ പലിശയും ചോദിച്ച് കടുത്ത ഭീഷണി നേരിട്ടു ആശയുടെ ആത്മഹത്യ കുറിപ്പില്‍ വ്യക്തമാക്കുന്നു. പൊലീസ് സ്റ്റേഷനിലും വീട്ടിലും ആശയെ ബിന്ദുവും പ്രദീപ് കുമാറും ചേര്‍ന്ന് ഭീഷണിപ്പെടുത്തുന്ന ദൃശ്യങ്ങളും പുറത്തുവന്നു.
ആശക്കും ബിന്ദുവിനും ഇടയില്‍ നടന്ന ലക്ഷങ്ങളുടെ സാമ്പത്തിക ഇടപാടില്‍ വന്‍ ദുരൂഹതയുണ്ടെന്ന് പൊലീസ് ചൂണ്ടിക്കാട്ടുന്നു.10 ലക്ഷം രൂപ വരെ ആശ കൈകാര്യം ചെയ്തിട്ടും ഭര്‍ത്താവ് പോലും അതറിഞ്ഞില്ല.ബിന്ദുവിന്റെ സാമ്പത്തിക സ്രോതസ് അന്വേഷിക്കുമെന്ന് പൊലീസ് പറഞ്ഞു.കടം വാങ്ങിച്ച തുക ആശ എന്തു ചെയ്തു എന്നതിലും സംശയങ്ങളുണ്ട്.
പണം മറ്റെവിടെയെങ്കിലും നിക്ഷപിച്ചോ, മറ്റാര്‍ക്കെങ്കിലും മറച്ച് നല്‍കി കുടുങ്ങിയോ തുടങ്ങിയ കാര്യങ്ങളെല്ലാം അന്വേഷിക്കുന്നുണ്ട്. ബിന്ദുവിന് പുറമെ മറ്റ് ചിലരില്‍ നിന്നും ആശ പണം കടംവാങ്ങിയതായി സൂചനയുണ്ട്. ബാങ്ക് വഴി നടന്നത് ചുരുങ്ങിയ പണമിടപാട് മാത്രമാണ്. ബാക്കിയെല്ലാം നേരിട്ടായിരുന്നു. വട്ടിപ്പലിശക്ക് പണം നല്‍കുന്നവര്‍ നീരിക്ഷണത്തിലാണെന്ന് പൊലീസ് പറഞ്ഞു. ബിന്ദുവും പ്രദീപും അത്തരക്കാരല്ലെന്നും പൊലീസ് പറഞ്ഞു.
ആശയുടെ മൃതദേഹം പോസ്റ്റ് മോര്‍ട്ടത്തിനും വീട്ടിലെ പൊതുദര്‍ശനത്തിനും ശേഷം കോട്ടുവള്ളി സെന്റ് സെബാസ്റ്റ്യന്‍ പള്ളി സെമിത്തേരിയില്‍ സംസ്‌കരിച്ചു.
2018ലെ വരാപ്പുഴ ഉരുട്ടിക്കൊലക്കേസുമായി ബന്ധപ്പെട്ട് അന്ന് പൊലീസ് മര്‍ദ്ദനത്തില്‍ കൊല്ലപ്പെട്ട ശ്രീജിത്തിന്റെ ബന്ധുക്കളോട് പൊലീസ് ഡ്രൈവറായിരുന്ന പ്രദീപ് കൈക്കൂലി ചോദിച്ച സംഭവമുണ്ടായിരുന്നു.ക്രൈംബാഞ്ച് അന്വേഷണത്തില്‍ നടപടി നേരിടുകയും ചെയ്തു. കേസിനെ തുടര്‍ന്ന് പ്രദീപിന് വിരമിക്കല്‍ ആനുകൂല്യങ്ങള്‍ ലഭിച്ചിട്ടില്ല.
