കാസര്ഗോഡ് : അസംബ്ലിക്കിടെ വിദ്യാര്ഥിയുടെ കര്ണപടം അടിച്ച് തകര്ത്ത സംഭവത്തില് കുണ്ടംകുഴി ഗവ. ഹയര്സെക്കന്ഡറി സ്കൂള് പ്രധാനാധ്യാപകന് എം അശോകനോട് അവധിയില് പോകാന് പൊതുവിദ്യാഭ്യാസ ഡയറക്ടര് നിര്ദ്ദേശം നല്കി. ജില്ലാ വിദ്യാഭ്യാസ ഉപഡയറക്ടറുടെ റിപ്പോര്ട്ട് പരിശോധിച്ച് നടപടി സ്വീകരിക്കും വരെ അവധിയില് പോകാനാണ് നിര്ദേശിച്ചത്. പ്രതിഷേധം കണക്കിലെടുത്താണ് നിര്ദേശം.
വിദ്യാഭ്യാസ മന്ത്രി വി ശിവന്കുട്ടി ആവശ്യപ്പെട്ടത് പ്രകാരം പത്താം ക്ലാസ് വിദ്യാര്ഥി അഭിനവ് കൃഷ്ണയുടെയും ഹെഡ്മാസ്റ്റര് എം അശോകന്റെയും മൊഴി ഡി ഡി ഇ ടി വി മധുസൂദനന് രേഖപ്പെടുത്തിയിരുന്നു. ഇതുമായി ബന്ധപ്പെട്ട് റിപ്പോര്ട്ടും സമര്പ്പിച്ചു.
സംഭവം പുറത്തുവന്നതോടെ സംസ്ഥാന ബാലാവകാശ കമ്മിഷന് സ്വമേധയാ കേസെടുത്തിട്ടുണ്ട്. എന്നാല് ഹെഡ്മാസ്റ്റര് എം അശോകന് ലക്ഷ്യം തെറ്റിയതാണെന്നും പിശക് പറ്റിയതാണെന്നുമാണ് പിടിഎ നിലപാട്. അധ്യാപകനെതിരെ കുട്ടിയുടെ രക്ഷിതാക്കള് ബേഡകം പൊലീസ് സ്റ്റേഷനില് പരാതി നല്കി. കേസ് ഒതുക്കി തീര്ക്കാന് അധ്യാപകനും പി ടി എ അംഗങ്ങളും വീട്ടില് എത്തി ചികിത്സാസഹായമായി ഒരു ലക്ഷം രൂപ വാഗ്ദാനം ചെയ്തെന്ന് വിദ്യാര്ഥിയുടെ അമ്മ ആരോപിച്ചിരുന്നു.
