ന്യൂദൽഹി : അന്താരാഷ്‌ട്ര ബഹിരാകാശ നിലയത്തിൽ നിന്ന് ഇന്ത്യയിലേക്ക് മടങ്ങിയ ബഹിരാകാശയാത്രികനായ ശുഭാൻഷു ശുക്ലയോട് നിരവധി കാര്യങ്ങൾ ചോദിച്ചറിഞ്ഞ് പ്രധാനമന്ത്രി നരേന്ദ്രമോദി. തിങ്കളാഴ്ച വൈകുന്നേരം പ്രധാനമന്ത്രിയുമായി നടത്തിയ സംഭാഷണത്തിന്റെ വീഡിയോ പുറത്തുവന്നു.
ബഹിരാകാശ യാത്രയുമായി ബന്ധപ്പെട്ട് പ്രധാനമന്ത്രി മോദി നിരവധി ചോദ്യങ്ങളാണ് ശുഭാൻഷു ശുക്ലയോട് ചോദിച്ചത്. ഇന്ത്യയുടെ ഗഗൻയാൻ ദൗത്യത്തിൽ ലോകമെമ്പാടും വലിയ താൽപ്പര്യമുണ്ടെന്ന് ശുഭാൻഷു ശുക്ല പ്രധാനമന്ത്രിയോട് പറഞ്ഞു. ലോകമെമ്പാടുമുള്ള ഉന്നത ശാസ്ത്രജ്ഞർ അതിൽ പങ്കാളികളാകാൻ ആഗ്രഹിക്കുന്നുവെന്നും അദ്ദേഹം സൂചിപ്പിച്ചു.
കൂടാതെ ആക്സിയം -4 ദൗത്യത്തിന്റെ ഭാഗമായി അന്താരാഷ്‌ട്ര ബഹിരാകാശ നിലയത്തിലേക്കുള്ള (ഐ‌എസ്‌എസ്) ബഹിരാകാശ യാത്ര, മൈക്രോഗ്രാവിറ്റി സാഹചര്യങ്ങളുമായുള്ള ക്രമീകരണം, ഓർബിറ്റൽ ലബോറട്ടറിയിൽ നടത്തിയ പരീക്ഷണങ്ങൾ എന്നിവയെക്കുറിച്ചുള്ള തന്റെ അനുഭവങ്ങളും ശുക്ല പങ്കുവെച്ചു.
ഇന്ത്യയുടെ ബഹിരാകാശ ദൗത്യങ്ങൾക്ക് 40-50 പേരുടെ ഒരു സംഘം ആവശ്യമാണെന്ന് പ്രധാനമന്ത്രി മോദി ശുക്ലയോട് പറഞ്ഞു. നിങ്ങളുടെ അനുഭവം നമ്മുടെ ഗഗൻയാൻ ദൗത്യത്തിന് വിലപ്പെട്ടതായിരിക്കുമെന്നും പ്രധാനമന്ത്രി ശുക്ലയോട് പറഞ്ഞു.
കൂടാതെ ഇന്ത്യയുടെ ഗഗൻയാൻ ദൗത്യത്തെക്കുറിച്ച് ആളുകൾ വളരെ ആവേശത്തിലാണ്. എന്റെ പല ക്രൂ അംഗങ്ങളും (ആക്സിയം -4 ദൗത്യത്തിന്റെ) വിക്ഷേപണത്തെക്കുറിച്ച് അറിയാൻ ആഗ്രഹിക്കുന്നുവെന്നും ശുക്ല പ്രധാനമന്ത്രിയോട് പറഞ്ഞു.
അതേ സമയം 2027 ൽ ആദ്യത്തെ മനുഷ്യ ബഹിരാകാശ പേടകം അയയ്‌ക്കാനും 2035 ഓടെ സ്വന്തമായി ഒരു ബഹിരാകാശ നിലയം നിർമ്മിക്കാനും ഇന്ത്യ പദ്ധതിയിടുന്നുണ്ട്. കൂടാതെ 2040 ഓടെ ചന്ദ്രനിൽ സ്വന്തം ബഹിരാകാശയാത്രികനെ ഇറക്കാനും ഇന്ത്യ ലക്ഷ്യമിടുന്നുണ്ട്.
