ന്യൂദല്‍ഹി: പ്രധാനമന്ത്രി നരേന്ദ്ര മോദിയുടെ ചെങ്കോട്ടയിലെ സ്വാതന്ത്ര്യദിന പ്രസംഗത്തിനു പിന്നാലെ കേന്ദ്ര ധനമന്ത്രാലയം ചരക്കുസേവന നികുതി വെട്ടിക്കുറയ്ക്കുന്നു. നിത്യോപയോഗ സാധനങ്ങളടക്കം 99 ശതമാനം വസ്തുക്കളുടെയും വില വരുംദിവസങ്ങളില്‍ കുത്തനെ കുറയും. മോദി സര്‍ക്കാരിന്റെ ദീപാവലി സമ്മാനമാണിത്.
നാലു ജിഎസ്ടി സ്ലാബുകള്‍ രണ്ടായി കുറയ്‌ക്കുമെന്നും 12, 28 ശതമാനം സ്ലാബുകള്‍ കളയുമെന്നും അഞ്ച്, 18 ശതമാനങ്ങളുടെ മാത്രം നിലനിര്‍ത്തുമെന്നുമാണ് 79-ാമത് സ്വാതന്ത്ര്യദിന പ്രസംഗത്തില്‍ നരേന്ദ്ര മോദി പ്രഖ്യാപിച്ചത്. മിക്ക സാധനങ്ങളുടെയും നികുതി വലിയ തോതില്‍ കുറയും, അങ്ങനെ വില കുറയും.
ജിഎസ്ടിയില്‍ ഘടനാപരമായ പരിഷ്‌കാരങ്ങള്‍ കൊണ്ടുവരാനും നിരക്കു യുക്തിസഹമാക്കാനും ജീവിതം സുഗമമാക്കാനുമുള്ള നടപടികളാണ് ധനമന്ത്രാലയം സ്വീകരിക്കുന്നത്. സാധാരണക്കാരുടെ മിക്ക സാധനങ്ങളുടെയും നികുതി കുറയും. മിക്കവയും സാധാരണക്കാര്‍ക്കു താങ്ങാവുന്ന വിലയില്‍ ലഭിക്കും. ഉപഭോഗം കൂടും, വിപണി കൂടുതല്‍ ഉഷാറാകും. സാമ്പത്തിക പ്രവര്‍ത്തനങ്ങള്‍ വളരെ ശക്തമാകും. സാമ്പത്തിക വളര്‍ച്ച ത്വരിതമാക്കും.
28 ശതമാനം ജിഎസ്ടിയുള്ള 90 ശതമാനം വസ്തുക്കളും 18 ശതമാന സ്ലാബിലാകും. പത്തുശതമാനം നികുതി കുറയും. 18 ശതമാനം നികുതിയുള്ള 99 ശതമാനം വസ്തുക്കളും അഞ്ചു ശതമാനത്തിലേക്കു നീക്കും.
അവശ്യ ഭക്ഷ്യവസ്തുക്കള്‍ക്കു ചരക്കുസേവന നികുതിയില്ല. നിത്യോപയോഗ സാധനങ്ങള്‍ക്ക് അഞ്ചു ശതമാനമാണ് ജിഎസ്ടി, ചിലയിനങ്ങള്‍ക്ക് 12. ഇലക്‌ട്രോണിക് വസ്തുക്കള്‍ക്കും സേവനത്തിനും 18 ശതമാനം. ആഡംബര വസ്തുക്കള്‍ക്ക് 28. പുതിയ ജിഎസ്ടി വരുമ്പോള്‍ അഞ്ചും, 12 ശതമാനവും മാത്രമാകും. അതിനു പിന്നാലെ മുന്തിയ ആഡംബര വസ്തുക്കള്‍ക്ക് 40 ശതമാനം ജിഎസ്ടി. അതൊരിക്കലും പാവപ്പെട്ടവരെയും സാധാരണക്കാരെയും ഇടത്തരക്കാരെയും ബാധിക്കില്ല. പുകയില അടക്കമുള്ള ആരോഗ്യത്തിനു ഹാനികരമായ ചില വസ്തുക്കള്‍ക്കും നികുതി 40 ശതമാനമാകും. പുതിയ നിരക്കുകള്‍ വഴി ഉപഭോഗം കൂടുമെന്നതിനാല്‍ നികുതി കുറയ്‌ക്കുന്നതുമൂലമുള്ള നഷ്ടം ഒഴിവാകും.
2020-21ല്‍ രാജ്യത്തെ ജിഎസ്ടി വരുമാനം 11.37 ലക്ഷം കോടിയായിരുന്നു. 2023-24ല്‍ 20.18 ലക്ഷം കോടിയായി കുതിച്ചുയര്‍ന്നു.
