കൊച്ചി:കോതമംഗലത്തു ടിടിസി വിദ്യാര്ഥിനിയുടെ ആത്മഹത്യയില് അറസ്റ്റിലായ പ്രതി ആലുവ പാനായിക്കുളം സ്വദേശി റമീസിന്റെ മാതാപിതാക്കള്ക്കെതിരെ ആത്മഹത്യാ പ്രേരണക്കുറ്റം ചുമത്തി. പിതാവ് റഹീം രണ്ടാം പ്രതിയും മാതാവ് ശരീഫ മൂന്നാം പ്രതിയുമാണ്.
റമീസ് അറസ്റ്റിലായതിനു പിന്നാലെ വീടു പൂട്ടി ഒളിവില്പ്പോയിരിക്കുകയാണ് ഇരുവരും.ഇവര് മുന്കൂര് ജാമ്യത്തിന് ശ്രമിക്കുന്നതായി സംശയമുണ്ട്. കേസില് യുവതിയുടെ സുഹൃത്ത് സഹദിനേയും പ്രതിചേര്ത്തു. യുവതിയെ റമീസ് മര്ദിക്കുന്നത് കണ്ടിട്ടും സഹദ് തടഞ്ഞില്ലെന്ന കണ്ടെത്തലിലാണിത്. ഇയാളെ പ്രത്യേക അന്വേഷണസംഘം ഉടന് ചോദ്യം ചെയ്യും.
അതേസമയം, റമീസിന്റെ മേല് ചുമത്തപ്പെട്ട കുറ്റങ്ങള്ക്ക് വ്യക്തമായ തെളിവുകള് ലഭിച്ചിട്ടുണ്ടെന്നാണ് പൊലീസ് പറയുന്നത്. എന്നാല്, നിര്ബന്ധിത മതപരിവര്ത്തനം വിഷയത്തില് കേസെടുക്കാന് പൊലീസ് തയാറായിട്ടില്ല. ഒരാളെ പ്രണയിക്കുന്നതും മതംമാറ്റി വിവാഹം കഴിക്കുന്നതും കുറ്റകരമായി കാണാനാകില്ലെന്ന നിലപാടിലാണ് പൊലീസ്.
എന്നാല് മതം മാറണമെന്ന് ആവശ്യപ്പെട്ട് യുവതിയെ റമീസും വീട്ടുകാരും മര്ദ്ദിച്ചെന്നും തുടര്ന്നുണ്ടായ പ്രശ്നങ്ങളെ തുടര്ന്നാണ് യുവതി ജീവനൊടുക്കിയതെന്നും സംഭവം എന് ഐ എ അന്വേഷിക്കണമെന്നുമാണ് കുടുംബം ആവശ്യപ്പെടുന്നത്.
എന്നാല് മതം മാറ്റിയശേഷം ചൂഷണം ചെയ്യുന്നതിനോ തീവ്രവാദ പ്രവര്ത്തനങ്ങള്ക്കോ മറ്റും ഉപയോഗിക്കുന്നതിനോ ആയിരുന്നു റമീസിന്റെ ലക്ഷ്യമെന്നു കണ്ടെത്തിയാലേ ലൗ ജിഹാദ് എന്നതിന്റെ അടിസ്ഥാനത്തില് കേസെടുക്കാന് കഴിയുകയുള്ളൂ.അന്വേഷണം തുടരുകയാണെന്നും ഓരോ ഘട്ടത്തിലും ലഭിക്കുന്ന തെളിവുകളുടെ അടിസ്ഥാനത്തില് ആവശ്യമെങ്കില് കൂടുതല് വകുപ്പുകള് ചുമത്തുമെന്നും പോലീസ് പറഞ്ഞു.
