ന്യൂദല്ഹി: 2024ലെ പൊതുതെരഞ്ഞെടുപ്പില് വയനാട്ടില് സ്ഥാനാര്ത്ഥിയായ പ്രിയങ്കാഗാന്ധിയ്ക്കും കള്ളവോട്ടുകള് കിട്ടിയിട്ടുണ്ടെന്നും ഒരു ലക്ഷത്തിനടുത്ത് സംശയാസ്പദവോട്ടുകള് കിട്ടിയിട്ടുണ്ടെന്നും ബിജെപി എംപി അനുരാഗ് താക്കൂര്. കഴിഞ്ഞ ദിവസം രാഹുല് ഗാന്ധിയ്ക്ക് റായ്ബറേലിയില് കള്ളവോട്ടുകള് കിട്ടിയതായി ആരോപിച്ചതിന് പിന്നാലെയാണ് അനുരാഗ് താക്കൂര് പുതിയ ആരോപണം ഉന്നയിച്ചത്.
ഇതോടെ ബിജെപിയ്ക്കെതിരെയും തെരഞ്ഞെടുപ്പ് കമ്മീഷനെതിരെയും വോട്ട് മോഷണ ആരോപണം നടത്തിയ കോണ്ഗ്രസ് നേതാക്കളായ രാഹുല് ഗാന്ധിയും പ്രിയങ്കയും വെട്ടിലായി. “വയനാട്ടില് സംശയാസ്പദമായ 93,499 വോട്ടര്മാരുണ്ട്. അതില് 20,438 പേര് വ്യാജവോട്ടര്മാരാണ്. 17450 പേര് വ്യാജവിലാസങ്ങളുള്ള വോട്ടര്മാരാണ്. 51365 വോട്ടര്മാരെ കൂട്ടിച്ചേര്ക്കലിലൂടെയും വോട്ടര്പട്ടികയില് ചേര്ത്തു. “- അനുരാഗ് താക്കൂര് ആരോപിക്കുന്നു.
പ്രിയങ്ക ഗാന്ധി വയനാട്ടില് ജയിക്കുന്നതിന് മുന്പ് രണ്ട് തവണ രാഹുല് ഗാന്ധി വയനാട്ടില് തെരഞ്ഞെടുപ്പില് ജയിച്ചിട്ടുണ്ട്. രാഹുല് ഗാന്ധിയുടെ മണ്ഡലമായ റായ് ബറേലിയില് രണ്ട് ലക്ഷം സംശയാസ്പദവോട്ടര്മാരുണ്ടായിരുന്നുവെന്ന് അനുരാഗ് താക്കൂര് കഴിഞ്ഞ ദിവസം ആരോപിച്ചിരുന്നു. “ഇതില് 19512 പേര് വ്യാജവോട്ടര്മാരും 71977 പേര് വ്യാജവിലാസങ്ങളുള്ള വോട്ടര്മാരും ആയിരുന്നു. 52000ല് പരം വ്യാജ ജനനസര്ട്ടിഫിക്കറ്റുകള് വ്യാജവിലാസങ്ങലുമായി ബന്ധപ്പെടുത്തുകയും ചെയ്തിട്ടുണ്ട്.”- റായ് ബറേലിയിലെ രാഹുല് ഗാന്ധിയുടെ വിജയം കളങ്കിതമാണെന്ന് ആരോപിച്ച് അനുരാഗ് താക്കൂര് പറയുന്നു.
