കൊച്ചി: നെല്‍കര്‍ഷകരുടെ പ്രശ്‌നങ്ങള്‍ ദേശീയ ശ്രദ്ധയില്‍ കൊണ്ടുവരുന്നതിനു കര്‍ഷകരുടെ സമരപ്രഖ്യാപന കണ്‍വന്‍ഷനും സെക്രട്ടേറിയറ്റ് നടയിലും ജില്ലാ കേന്ദ്രങ്ങളിലും പ്രതിഷേധ ധര്‍ണ സംഘടിപ്പിക്കുന്നു. സംസ്ഥാനത്തെ കര്‍ഷകര്‍, പ്രത്യേകിച്ച് നെല്‍കര്‍ഷകര്‍ അഭിമുഖീകരിക്കുന്ന പ്രശ്‌നങ്ങള്‍ ചര്‍ച്ച ചെയ്യാന്‍ എറണാകുളത്ത് നടന്ന കര്‍ഷക നേതൃസമ്മേളനമാണ് ഈ തീരുമാനമെടുത്തത്. 20ന് പാലക്കാട്ട് കര്‍ഷക സമരപ്രഖ്യാപന കണ്‍വന്‍ഷന്‍. 29ന് തിരുവനന്തപുരത്ത് ധര്‍ണയും നടക്കും.
ബിജെപി ദേശീയ നിര്‍വാഹക സമിതി അംഗം കുമ്മനം രാജശേഖരന്‍ യോഗം ഉദ്ഘാടനം ചെയ്തു. പാലക്കാട്, തൃശൂര്‍, കുട്ടനാട്, പത്തനംതിട്ട, കോട്ടയം അടക്കം സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള കര്‍ഷക- പാടശേഖര സമിതികളുടെ നേതാക്കള്‍ പങ്കെടുത്തു. ബിജെപി സംസ്ഥാന വൈസ് പ്രസിഡന്റ് സി. കൃഷ്ണകുമാര്‍, കര്‍ഷക മോര്‍ച്ച സംസ്ഥാന പ്രസിഡന്റ് ഷാജി ആര്‍. നായര്‍ തുടങ്ങിയവര്‍ സംസാരിച്ചു.
കേന്ദ്ര സര്‍ക്കാര്‍ കേരളത്തിലെ കര്‍ഷകരെ സഹായിക്കാന്‍ തയാറാണെന്ന് കുമ്മനം രാജശേഖരന്‍ പറഞ്ഞു. ദല്‍ഹിയില്‍ കൃഷി-പൊതുവിതരണ വകുപ്പ് മന്ത്രിമാരുമായി ചര്‍ച്ച നടത്തിയതിന്റെ പശ്ചാത്തലത്തിലാണ് അദ്ദേഹം ഇക്കാര്യം അറിയിച്ചത്. ബിജെപി നേതാക്കളായ രാജീവ് ചന്ദ്രശേഖര്‍, കുമ്മനം രാജശേഖരന്‍, സി. കൃഷ്ണകുമാര്‍, ഷാജി ആര്‍. നായര്‍ എന്നിവരാണ് കഴിഞ്ഞദിവസം ദല്‍ഹിയില്‍ കേന്ദ്രമന്ത്രിമാരെക്കണ്ട് സംസ്ഥാനത്തെ കര്‍ഷക പ്രശ്‌നങ്ങള്‍ ശ്രദ്ധയില്‍ പെടുത്തിയത്. ഇക്കാര്യങ്ങള്‍ പഠിക്കുന്നതിന് ഒരു കേന്ദ്രസംഘം സംസ്ഥാനത്തെത്തും. അതിനു ശേഷം കേന്ദ്ര കൃഷിമന്ത്രിയും കേരളം സന്ദര്‍ശിക്കുമെന്ന് നേതാക്കള്‍ അറിയിച്ചു.
സംസ്ഥാന സര്‍ക്കാര്‍ കര്‍ഷകരെ വഞ്ചിക്കുകയാണെന്ന് യോഗത്തില്‍ സംസാരിച്ച കര്‍ഷക സംഘടനാ നേതാക്കള്‍ പറഞ്ഞു.
കുട്ടനാട് നെല്‍കര്‍ഷക സംരക്ഷണ സമിതി ജനറല്‍ സെക്രട്ടറി സോണിച്ചന്‍ പുളികുന്ന്, വൈസ് പ്രസിഡന്റ് പി. വേലായുധന്‍ നായര്‍, രക്ഷാധികാരി കൃഷ്ണപ്രസാദ്, പാലക്കാട് കര്‍ഷക സംരക്ഷണ സമിതി ഭാരവാഹികളായ സി. പ്രഭാകരന്‍, സി. വിജയന്‍, കെ. ശിവാനന്ദന്‍, ദേശീയ കര്‍ഷക സംരക്ഷണ സമിതി ഭാരവാഹികളായ പാണ്ടിയോട് പ്രഭാകരന്‍, രാജേഷ് പെരുവെമ്പ്, വി. ബാലകൃഷ്ണന്‍ മാസ്റ്റര്‍, പറമ്പിക്കുളം ആളിയാര്‍ ജലസംരക്ഷണ സമിതി ജനറല്‍ സെക്രട്ടറി അഡ്വ. പി.സി. ശിവശങ്കരന്‍, കര്‍ഷക സമാജം പാലക്കാട് ഭാരവാഹികളായ മുതലാംതോട് മണി, വിജയരാഘവന്‍, എ.ബി. അരവിന്ദാക്ഷന്‍, പാലക്കാടന്‍ കര്‍ഷക മുന്നേറ്റം ഭാരവാഹി സജീഷ് കുത്തനൂര്‍, ഗോപന്‍ ചെന്നിത്തല, അപ്പര്‍ കുട്ടനാട് നെല്ല് കര്‍ഷക കൂട്ടായ്‌മ ടി. അനിയപ്പന്‍, കൊച്ച് വാവക്കാട് പാടശേഖരസമിതി തുറവൂര്‍ എന്നിവര്‍ വിവിധ കര്‍ഷക സംഘടനകളെ പ്രതിനിധികരിച്ചു പങ്കെടുത്തു.
