തൃശൂര്‍:തൃശൂര്‍ ഗവ. മെഡിക്കല്‍ കോളേജ് ആശുപത്രിയിലെ ഇ.എന്‍.ടി. വിഭാഗം വനിതാ ജൂനിയര്‍ ഡോക്ടറെ ജോലി സമയത്ത് ആക്രമിച്ചെന്ന പരാതിയില്‍ ഏഴ് നഴ്സുമാരെ രണ്ട് ദിവസത്തേക്ക് ഡ്യൂട്ടിയില്‍ നിന്ന് മാറ്റിനിര്‍ത്താന്‍ ആശുപത്രി സൂപ്രണ്ട് ഉത്തരവിട്ടു.
കേരള മെഡിക്കല്‍ പോസ്റ്റ് ഗ്രാജ്വേറ്റ് അസോസിയേഷന്‍, ആശുപത്രി സൂപ്രണ്ടിന് നല്‍കിയ പരാതി പ്രകാരം നടത്തിയ അന്വേഷണത്തിലാണ് നടപടി.
സൂപ്രണ്ട് നിയോഗിച്ച അന്വേഷണ കമ്മിറ്റിയുടെ ശുപാര്‍ശ പ്രകാരമാണ് രണ്ട് ദിവസത്തേക്ക് നഴ്സുമാരെ ഡ്യൂട്ടില്‍ നിന്ന് മാറ്റി നിര്‍ത്താനുളള തീരുമാനം. രണ്ട് ദിവസത്തെ ഈ അവധി, ലീവോ ഓഫോ ആയി കണക്കാക്കില്ലെന്നും മൂന്നാം ദിവസം സൂപ്രണ്ടിന്റെ അനുമതിയോടെ മാത്രമേ ജോലിയില്‍ പ്രവേശിക്കാന്‍ പാടുള്ളൂ എന്നും ഉത്തരവിലുണ്ട്.
അതേസമയം, തങ്ങളുടെ ഭാഗം കേള്‍ക്കാതെയാണ് സൂപ്രണ്ട് ഏകപക്ഷീയമായ തീരുമാനം എടുത്തതെന്ന് ആരോപിച്ച് നടപടിക്ക് വിധേയരായ നഴ്സുമാര്‍ നഴ്‌സസ് യൂണിയന് പരാതി നല്‍കിയിട്ടുണ്ട്.
