കൊച്ചി: വാറന്റി കാലയളവിനുള്ളില്‍ തകരാറിലായ സോളാര്‍ പ്ലാന്റ് ശരിയാക്കി നല്‍കുന്നതില്‍ വീഴ്ചവരുത്തിയതിന് ഉപഭോക്താവിന് 2.5 ലക്ഷം രൂപ നഷ്ടപരിഹാരം നല്‍കണമെന്ന് എറണാകുളം ജില്ല ഉപഭോക്തൃ തര്‍ക്ക പരിഹാര കമ്മീഷന്‍. തേവരയിലെ വിദ്യോദയ സ്‌കൂള്‍ , 2018-ല്‍ തൃശ്ശൂര്‍ ആസ്ഥാനമായി പ്രവര്‍ത്തിക്കുന്ന സൗര നാച്ചുറല്‍ എനര്‍ജി സൊല്യൂഷന്‍സ് ഇന്ത്യ പ്രൈവറ്റ് എന്ന സ്ഥാപനത്തില്‍ നിന്ന് 13,36,677 രൂപ നല്‍കി സ്ഥാപിച്ച സൗരോര്‍ജ പ്ലാന്റിന്‌റെ ഇന്‍വെര്‍ട്ടര്‍ വാറന്റി അവസാനിക്കുന്നതിന് തൊട്ടുമുമ്പ് തകരാറിലാവുകയായിരുന്നു. കമ്പനി ഇന്‍വെര്‍ട്ടര്‍ കൊണ്ടുപോയെങ്കിലും വാറന്റി കാലഹരണപ്പെട്ടുവെന്ന് ചൂണ്ടിക്കാട്ടി ശരിയാക്കുന്നതിന് പണം ആവശ്യപ്പെടുകയായിരുന്നു. കമ്പനി വാറന്റി വ്യവസ്ഥകള്‍ പാലിക്കുന്നതില്‍ പരാജയപ്പെട്ടുവെന്നും ഇത് സേവനത്തിലെ ഗുരുതരമായ വീഴ്ചയാണെന്നും കമ്മീഷന്‍ കണ്ടെത്തി.
