ഗാസ: മാംസപേശി ക്ഷയിക്കുന്ന രോഗമുള്ള കുട്ടിയുടെ ചിത്രം കാട്ടി, ഇസ്രയേല്‍ അക്രമത്താല്‍ എല്ലും തോലുമായിപ്പോയ കുട്ടിയായി അവതരിപ്പിച്ച് ന്യൂയോര്ക്ക് ടൈംസ്. ഇതിന്റെ പിന്നിലെ സത്യാവസ്ഥ കണ്ടെത്തിയിട്ടും മാപ്പ് പറയാന്‍ ന്യൂയോര്ക്ക് ടൈംസ് തയ്യാറായിട്ടില്ല.
ഗാസയിലെ മുഹമ്മദ് സഖറിയ അയൂബ് അല്‍ മതൂഖ് എന്ന കുട്ടി എല്ലും തോലുമായതിന് ഇസ്രയേല്‍ പട്ടാളവുമായി യാതൊരു ബന്ധവുമില്ല. മുഹമ്മദ് സഖറിയ അയൂബ് അല്‍ മതൂഖ് എന്ന കുട്ടി ശോഷിച്ചതിന് കാരണം ശരീരം മെലിയുന്ന ജനിതകരോഗം കാരണമാണ്. പല ഫൊട്ടോഗ്രാഫര്‍മാരും അവാര്‍ഡിനായും കയ്യടി നേടാനും സത്യം മറച്ചുവെച്ച് ഇത്തരം ഫോട്ടോകള്‍ പ്രസിദ്ധീകരിക്കാറുണ്ട്.
എല്ലുന്തിയ ദയനീയരൂപമായ മുഹമ്മദ് സഖറിയ അയൂബ് അല്‍ മതൂഖിനെ അവന്റെ ഉമ്മ ചേര്‍ത്ത് പിടിച്ച് നില്‍ക്കുന്ന ചിത്രം ഇസ്രയേല്‍ അക്രമം മൂലം ദുരിതത്തിലായ ഗാസയിലെ കുട്ടികളുടെ പ്രതീകമായി അവതരിപ്പിച്ച് ന്യൂയോര്ക്ക് ടൈംസ് പത്രം.
ഈ ഫോട്ടോയ്‌ക്ക് പിന്നിലെ തട്ടിപ്പ് വെളിച്ചത്ത് കൊണ്ടുവന്നത് മറ്റൊരു ഫോട്ടോയാണ്. യഥാര്‍ത്ഥ ചിത്രത്തില്‍ ഉമ്മയും മുഹമ്മദ് സഖറിയ അയൂബ് അല്‍ മതൂഖും മാത്രമല്ല, അവന്റെ സഹോദരനും കൂടിയുണ്ടത്രെ. ഈ ചിത്രത്തില്‍ മുഹമ്മദ് സഖറിയ അയൂബ് അല്‍ മതൂഖിന്റെ സഹോദരന്‍ നല്ല ആരോഗ്യമുള്ള കുട്ടിയാണെന്ന് കാണാം. എന്നാല്‍ ന്യൂയോര്ക്ക് ടൈംസിന്റെ ഫൊട്ടോഗ്രാഫര്‍ ആരോഗ്യമുള്ള സഹോദരനെ മാറ്റി നിര്‍ത്തി എല്ലുന്തിയ, അവശനായ മുഹമ്മദ് സഖറിയ അയൂബ് അല്‍ മതൂഖിനെ അവന്റെ ഉമ്മ എടുത്തുനില്‍ക്കുന്ന ഫോട്ടോയാണ് നല്‍കുകയായിരുന്നു. വസ്തുതകള്‍ വെളിച്ചത്തായതോടെ ന്യൂയോര്ക്ക് ടൈംസ് മാത്രമല്ല, ഈ ചിത്രവും വാര്‍ത്തയും അതേ പടി പ്രസിദ്ധീകരിച്ച ബിബിസി, സിഎന്‍എന്‍, ഗാര്‍ഡിയന്‍, ഡെയ് ലി മെയില്‍ തുടങ്ങി അമേരിക്കയിലെ ഡീപ് സ്റ്റേറ്റിന്റെ മാധ്യമങ്ങളെല്ലാം വെട്ടിലായി.
വലിയ കയ്യടി കിട്ടിയ,സമൂഹമാധ്യമങ്ങളില്‍ കാട്ടുതീ പോലെ പ്രചരിച്ച ഈ ചിത്രം ഒരു കള്ളമാണെന്ന് തെളിഞ്ഞതോടെ ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവും ഈ ചിത്രം പ്രസിദ്ധീകരിച്ച മാധ്യമങ്ങള്‍ക്കെതിരെ ശക്തമായ വിമര്‍ശനം ഉയര്‍ത്തിയിരിക്കുകയാണ്. സത്യം വേറൊന്നായിരിക്കെ, ഈ ചിത്രത്തിന്റെ പേരില്‍ ഇസ്രയേലിനെ പ്രതിക്കൂട്ടിലാക്കിയതിനെതിരെ ഇപ്പോള്‍ ആഞ്ഞടിക്കുകയാണ് ഇസ്രയേല്‍. ഇന്ത്യയിലെ ജോര്‍ജ്ജ് സോറോസുമായും ഡീപ് സ്റ്റേറ്റുമായും ബന്ധമുള്ള നിരവധി എന്‍ജിഒ സംഘടനകളും ഇസ്രയേലിനെ പ്രതിക്കൂട്ടിലാക്കാന്‍ ഈ ചിത്രം ഉപയോഗിച്ചിരുന്നു. അവരും അബദ്ധം തിരിച്ചറിഞ്ഞിട്ടും മൗനം പാലിക്കുകയാണ്.
കള്ളിവെളിച്ചത്തായിട്ടും ന്യൂയോര്ക്ക് ടൈംസോ, ഇതേ ഫോട്ടോ ഇസ്രയേലിന് എതിരായ രാഷ്‌ട്രീയ അജണ്ടയ്‌ക്ക് ഉപയോഗിച്ച ബിബിസിയോ ഗാര്‍ഡിയനോ ഡെയ്ലി മെയിലോ തങ്ങള്‍ ചെയ്ത ഗുരുതരമായ തെറ്റിന് മാപ്പ് പറഞ്ഞിട്ടില്ല ഇതുവരെയും.
