ന്യൂദല്ഹി: പഹല്ഗാം ആക്രമണം നടത്തിയ നാല് ഭീകരരെ പിടികൂടാന് കഴിയാത്തത് ഇന്ത്യയുടെ രഹസ്യഏജന്സികളുടെ പരാജയമാണെന്നും കേന്ദ്ര ആഭ്യന്തരമന്ത്രി അമിത് ഷാ രാജിവെയ്ക്കണമെന്നും ആവശ്യപ്പെട്ട് ഏറ്റവുമധികം ബഹളം കൂട്ടിയവര് രാഹുല്ഗാന്ധിയും പി.ചിദംബരവും മല്ലികാര്ജുന് ഖാര്ഗെയും ഉദ്ധവ് താക്കറെ പക്ഷം എംപി പ്രിയങ്ക ചതുര്വേദിയുമാണ്. പക്ഷെ പഹല്ഗാം ഭീകരരെ വെടിവെച്ച് കൊന്നപ്പോള് ഇവര്ക്ക് മിണ്ടാട്ടമില്ല.
ഓപ്പറേഷന് സിന്ദൂറില് പാകിസ്ഥാന് മേല് ഇന്ത്യ വിജയം നേടിയപ്പോഴും പഹല്ഗാം ഭീകരരെ ഇതുവരെ പിടികൂടാന് കഴിയാത്ത ഇന്ത്യയുടെ രഹസ്യ അന്വേഷണ ഏജന്സികളെ പരിഹസിക്കുകയായിരുന്നു രാഹുല് ഗാന്ധി. ഇതിന്റെ പേരില് അമിത് ഷാ രാജിവെയ്ക്കണം എന്ന് വരെ രാഹുല് ഗാന്ധി ആവശ്യപ്പെട്ടിരുന്നു.
പഹല്ഗാം ഭീകരര് പാകിസ്ഥാനികളല്ലെന്നും കശ്മീരില് ജനിച്ചുവളര്ന്നവരാണെന്നും ആയിരുന്നു പി. ചിദംബരത്തിന്റെ വിമര്ശനം. ഇത്രനാളായിട്ടും ഈ ഭീകരരെ പിടികൂടാന് സാധിക്കാത്തത് കേന്ദ്രസര്ക്കാരിന്റെ വന്പിഴവാണെന്നും പി.ചിദംബരം കുറ്റപ്പെടുത്തിയിരുന്നു. പക്ഷെ പഹല്ഗാം ഭീകരരെ വകവരുത്തുകയും അവരുടെ പാക് പൗരത്വം കൃത്യമായി അവരുടെ പോക്കറ്റില് നിന്നും കണ്ടെടുത്ത ഐഡി കാര്ഡുകളിലൂടെ തിരിച്ചറിയപ്പെടുകയും ചെയ്തിരുന്നു.
ഉദ്ധവ് താക്കറെ പാര്ട്ടി വിഭാഗം എംപി പ്രിയങ്ക ചതുര്വേദി പഹല്ഗാം ഭീകരരെ പിടികൂടാന് കഴിയാത്തതില് കേന്ദ്രസര്ക്കാരിനെ കുറ്റപ്പെടുത്തിയിരുന്നു. എന്നാല് പഹല്ഗാം ഭീകരരെ പിടികൂടിയതിന് ശേഷം ഇതുവരെയും പ്രിയങ്ക ചതുര്വേദി പ്രതികരിച്ചിട്ടില്ല. പാകിസ്ഥാനില് അസിം മുനീര് നടത്തിയ പ്രസംഗത്തെക്കൂറിച്ച് കേട്ടയുടന് ഇന്റലിജന്സ് ഏജന്സി ജാഗ്രതാനിര്ദേശം നല്കേണ്ടതായിരുന്നു എന്നാണ് പ്രിയങ്ക ചതുര്വേദി പറഞ്ഞത്. എത്രയോ ഇന്ത്യാവിരുദ്ധ പ്രസംഗങ്ങള് പാകിസ്ഥാനില് നടക്കുന്നു. ഓരോ പ്രസംഗത്തിനും തുടര്ച്ചയായി ഇന്ത്യയില് ആക്രമണം ഉണ്ടാകുമെന്ന് മുന്കൂട്ടികണ്ട് കശ്മീരില് മുഴുവന് സേനയെ വിന്യസിപ്പിക്കുന്നത് പ്രായോഗികമാണോ? അങ്ങിനെയെങ്കില് കടല്മാര്ഗ്ഗം ബോട്ടുപയോഗിച്ച് മുംബൈ തീരത്ത് എത്തിയ 2008ലെ ലഷ്കര് ഭീകരരെക്കുറിച്ച് കോണ്ഗ്രസ് ഭരിയ്ക്കുമ്പോള് എന്തെങ്കിലും ഇന്റലിജന്സ് മുന്നറിയിപ്പ് ലഭിച്ചിരുന്നോ?അന്ന് 166 ഇന്ത്യക്കാരാണ് മുംബൈയിലെ ടാജ് ഹോട്ടല് ഉള്പ്പെടെയുള്ള നാല് കേന്ദ്രങ്ങളില് ഭീകരര് നടത്തിയ ആക്രമണത്തില് കൊല്ലപ്പെട്ടത്. ഭീകരരെ നേരിടാനെത്തിയ ഒരു പൊലീസുകാരന് കൊല്ലപ്പെട്ടത് ഗുണനിലവാരമില്ലാത്ത ബുള്ളറ്റ് പ്രൂഫ് ജാക്കറ്റ് അണിഞ്ഞതുകൊണ്ടാണ് എന്നത് മന്മോഹന് സിങ്ങ് ഭരണത്തിലെ പിടിപ്പുകേടാണ് സൂചിപ്പിക്കുന്നത്. മാത്രമല്ല, ആ ഭീകരാക്രമണത്തിനെതിരെ ഓപ്പറേഷന് സിന്ദൂര് പോകട്ടെ, ഒരു ചെറുവിരല് അനക്കാന് പോലും മന്മോഹന് സര്ക്കാരിന് കഴിഞ്ഞില്ല.
