ന്യൂഡൽഹി ; പ്രധാനമന്ത്രി കിസാൻ സമ്മാൻ നിധി യോജനയുടെ (പിഎം കിസാൻ പദ്ധതി) 20-ാം ഗഡു കേന്ദ്ര സർക്കാർ നാളെ, പുറത്തിറക്കും. ഉത്തർപ്രദേശിലെ വാരണാസിയിൽ നടക്കുന്ന പരിപാടിയിൽ പ്രധാനമന്ത്രി നരേന്ദ്ര മോദി 20-ാം ഗഡു വിതരണം ചെയ്യും. 9.7 കോടിയിലധികം കർഷകരുടെ അക്കൗണ്ടുകളിലേക്ക് ആകെ 20,500 കോടിയാണ് നൽകുക . ഓരോ കർഷകനും അക്കൗണ്ടിൽ 2,000 രൂപ വീതം ലഭിക്കും.
വാരണാസിയിൽ നടക്കുന്ന പരിപാടിയിൽ മോദി കർഷകരെ അഭിസംബോധന ചെയ്യും. രാജ്യത്തിന്റെ വിവിധ ഗ്രാമപ്രദേശങ്ങളിൽ പ്രധാനമന്ത്രിയുടെ പ്രസംഗങ്ങൾ കേൾക്കാൻ ക്രമീകരണങ്ങൾ ചെയ്തിട്ടുണ്ട്.
2019 ൽ ആരംഭിച്ച പിഎം കിസാൻ പദ്ധതി പ്രകാരം കേന്ദ്ര സർക്കാർ കർഷകർക്ക് പ്രതിവർഷം 6,000 രൂപ നൽകുന്നു. ഈ പണം വർഷത്തിൽ മൂന്ന് ഗഡുക്കളായിട്ടാണ് നൽകുന്നത്. ഇതുവരെ, സർക്കാർ 19 ഗഡുക്കളാക്കി 3.69 ലക്ഷം കോടി രൂപ നേരിട്ട് കർഷകരുടെ അക്കൗണ്ടുകളിലേക്ക് കൈമാറി.
