കോട്ടയം: അതിരമ്പുഴ കോട്ടമുറി കാക്കനാട്ടുകാലായില് കെ.എ. മാത്യുവിന്റെ ഭാര്യ ജെയിന് മാത്യു (ജയ്നമ്മ)വിനെ കാണാതായതിലെ ദുരൂഹത ഒഴിവാകാന് ഡിഎന്എ പരിശോധന ഫലം ലഭിക്കണം. ജയ്നമ്മയുമായി ബന്ധമുണ്ടെന്ന് കണ്ടെത്തിയ ചേര്ത്തല പള്ളിപ്പുറം സ്വദേശി സെബാസ്റ്റ്യന്റെ വീടിനോടു ചേര്ന്ന പുരയിടത്തില്നിന്ന് ലഭിച്ച കത്തിക്കരിഞ്ഞ ശരീരാവശിഷ്ടങ്ങള് ഇന്നലെ കോട്ടയം മെഡിക്കല് കോളേജില് വിദഗ്ധ പരിശോധനയ്ക്കു വിധേയമാക്കി.
ജയ്നമ്മയുടെ സഹോദരന് സാവിയോ, സഹോദരി ആന്സി എന്നിവരുടെ സാമ്പിളുകള് ഡിഎന്എ പരിശോധനയ്ക്കായി ശേഖരിച്ചിട്ടുണ്ട്. ഡിഎന്എ പരിശോധന ഫലം ലഭിച്ചെങ്കില് മാത്രമെ കൊലചെയ്യപ്പെട്ടത് ജയ്നമ്മ തന്നെയാണോ എന്നു സ്ഥിരീകരിക്കാനാകുക.
ജയ്നമ്മയെ കാണാതായത് കഴിഞ്ഞ ഡിസംബര് 23 നാണ്. നാലു ദിവസം കഴിഞ്ഞപ്പോഴാണ് ആദ്യം സഹോദരനും പിന്നീട് ഭര്ത്താവും പൊലീസില് പരാതി നല്കിയത്. ഈ പരാതിയിന്മേല് അന്വേഷണം ഫലപ്രദമല്ലെന്ന ആക്ഷേപവും ഉയര്ന്ന പശ്ചാത്തലത്തില് കഴിഞ്ഞ ഏപ്രിലില് ഹൈക്കോടതി നിര്ദ്ദേശത്തെത്തുടര്ന്ന് ക്രൈംബ്രാഞ്ച് അന്വേഷണം ഏറ്റെടുത്തു. ക്രൈംബ്രാഞ്ച് അന്വേഷണത്തിലാണ് ചേര്ത്തല പള്ളിപ്പുറം സ്വദേശി സെബാസ്റ്റ്യനും ജയ്നമ്മയുമായുള്ള ബന്ധത്തെക്കുറിച്ച് പൊലീസിന് വിവരം ലഭിക്കുന്നത്. സെബാസ്റ്റ്യന്റെ വീട്ടിലും പരിസരത്തും പൊലീസ് കഴിഞ്ഞ ദിവസം നടത്തിയ പരിശോധനയില് കത്തിച്ചനിലയിലുള്ള ശരീരാവശിഷ്ടങ്ങള് ലഭിച്ചു. നൂറിലേറെ അസ്ഥിക്കഷണങ്ങളാണ് വീട്ടു പരിസരത്ത് നിന്ന് ലഭിച്ചത്. സെബാസ്റ്റ്യനുമായി ബന്ധമുണ്ടായിരുന്ന ചേര്ത്തല കടക്കരപ്പള്ളി സ്വദേശിനി ബിന്ദു പത്മനാഭന്റെ തിരോധാനക്കേസും നിലവിലുണ്ടായിരുന്നു. പുരയിടത്തില്നിന്നു കണ്ടെത്തിയ മൃതദേഹാവശിഷ്ടങ്ങള് ആരുടേതെന്ന് തിരിച്ചറിയേണ്ടതുണ്ട്.
ജയ്നമ്മ പതിവായി വിവിധ ധ്യാനകേന്ദ്രങ്ങളിലെ ധ്യാനത്തില് പങ്കെടുക്കുമായിരുന്നു. ധ്യാനത്തില് പങ്കെടുക്കാനായി ഒരാഴ്ചയോളം വീട്ടില്നിന്നു മാറിനില്ക്കാറുമുണ്ടായിരുന്നു.ചേര്ത്തലയ്ക്കു സമീപമുള്ള ഒരു ധ്യാനകേന്ദ്രത്തിലും ഇവര് പോകാറുണ്ടായിരുന്നു. 20 പവനോളം സ്വര്ണാഭരണങ്ങളുള്ള ജയ്നമ്മ 15 പവനോളം ശരീരത്തില് അണിയുകയും അവശേഷിക്കുന്നവ കൈയില് കൊണ്ടുനടക്കുന്ന ചെറിയ പേഴ്സില് സൂക്ഷിക്കുകയുമായിരുന്നെന്ന് ബന്ധുക്കള് പറയുന്നു.
ഏതോ സ്വകാര്യ പണമിടപാട് സ്ഥാപനത്തില് ആഭരണങ്ങള് പണയം വച്ചെന്നും സൂചനയുണ്ട്. ജയ്നമ്മയുടെ മൊബൈല് ഫോണുമായി ബന്ധപ്പെട്ടു സൈബര് സെല് അന്വേഷണത്തില് ചേര്ത്തല പള്ളിപ്പുറത്തെ സെബാസ്റ്റ്യന്റെ പുരയിടത്തിലാണ് സാന്നിധ്യമറിയിച്ചത്.
