തിരുവനന്തപുരം: ബിജെപിയുടെ നേതൃത്വത്തില്‍ ക്രൈസ്തവ സമൂഹത്തിന് എതിരെ അതിക്രമങ്ങള്‍ നടക്കുന്നുവെന്ന ആരോപണത്തിന് പിന്നില്‍ ഗൂഢാലോചനയെന്ന് മുന്‍ കേന്ദ്രമന്ത്രി വി. മുരളീധരന്‍. പള്ളിത്തുറയില്‍ രാഷ്‌ട്രീയ വിശദീകരണ യോഗത്തില്‍ സംസാരിക്കുകയായിരുന്നു മുന്‍കേന്ദ്രമന്ത്രി. പള്ളിത്തുറ ബിജെപി കാര്യാലയവും അദ്ദേഹം ഉദ്ഘാടനം ചെയ്തു.
ബിജെപിക്ക് അനുകൂലമായി കേരളത്തിലുണ്ടാകുന്ന തരംഗത്തെ അട്ടിമറിക്കാനും താറടിക്കാനുമാണ് ഇന്‍ഡി സഖ്യം ശ്രമിക്കുന്നത്. ഛത്തീസ്ഗഡില്‍ അറസ്റ്റിലായ ക്രൈസ്തവ സഹോദരിമാര്‍ക്ക് നീതി ലഭ്യമാക്കണം എന്നത് തന്നെയാണ് ബിജെപിയുടെ നിലപാട്. വിഷയത്തില്‍ ഛത്തീസ്ഗഡ് സര്‍ക്കാര്‍ ഒരു തരത്തിലും മതപരമോ രാഷ്‌ട്രീയമോ ആയ വിവേചനം കാട്ടുന്നില്ല. നിയമവിരുദ്ധമായ ഒന്നുംതന്നെ കന്യാസ്ത്രീകള്‍ ചെയ്തിട്ടില്ലെങ്കില്‍ അവര്‍ മോചിതരാകുക തന്നെ ചെയ്യും. കലക്കവെള്ളത്തില്‍ മീന്‍ പിടിക്കാനാണ് ഇന്‍ഡി സഖ്യം ശ്രമിക്കുന്നതെന്നും മുരളീധരന്‍ പറഞ്ഞു.
2022ല്‍ ഛത്തീസ്ഗഡ് കോണ്‍ഗ്രസ് സര്‍ക്കാര്‍ ഭരിക്കുമ്പോള്‍ ക്രിസ്തീയ സഹോദരങ്ങള്‍ക്കെതിരെ നടന്നിട്ടുള്ള അക്രമം 132 എണ്ണമാണ്. ഇതെല്ലാം ഭരിക്കുന്ന സര്‍ക്കാര്‍ ചെയ്യിപ്പിച്ചതാണോ എന്ന് കോണ്‍ഗ്രസ് മറുപടി പറയണം. ക്രൈസ്തവസ്‌നേഹം പറയുന്ന ഇന്‍ഡി സഖ്യം മുനമ്പം വിഷയത്തില്‍ എവിടെയായിരുന്നു. ഒരു ക്രിസ്ത്യന്‍ ഗ്രാമം ഒന്നടങ്കം കുടിയിറക്ക് ഭീഷണിയില്‍ നില്‍ക്കുമ്പോള്‍ ഇവര്‍ തിരിഞ്ഞു നോക്കിയിരുന്നില്ല. അദ്ദേഹം പരിഹസിച്ചു.
