കൊച്ചി: വിദ്യാഭ്യാസത്തില്‍ ഭൗതികതയും ആത്മീയതയും സന്തുലിതമായിരിക്കണമെന്ന് ആര്‍എസ്എസ് സര്‍സംഘചാലക് ഡോ. മോഹന്‍ ഭാഗവത്. ശിക്ഷ സംസ്‌കൃതി ഉത്ഥാന്‍ ന്യാസ് ആഭിമുഖ്യത്തില്‍ പിറവം ആദിശങ്കരനിലയത്തില്‍ ആരംഭിച്ച രണ്ടുദിവസത്തെ ദേശീയ വിദ്യാഭ്യാസ ചിന്തന്‍ ബൈഠക്ക് ഉദ്ഘാടന സഭയില്‍ സംസാരിക്കുകയായിരുന്നു അദ്ദേഹം.
ഭാരതത്തില്‍ വിദ്യാഭ്യാസ പരിവര്‍ത്തനം ഏതെങ്കിലും സംഘടനയോ സ്ഥാപനങ്ങളോ മാത്രം ചെയ്യേണ്ടതല്ലെന്ന് ചടങ്ങില്‍ സംസാരിച്ച ശിക്ഷ സംസ്‌കൃതി ഉത്ഥാന്‍ ന്യാസ് ദേശീയ ജനറല്‍ സെക്രട്ടറി ഡോ. അതുല്‍ കോത്താരി പറഞ്ഞു. പൂര്‍ണമായ കൂട്ടായ്‌മയിലൂടെയേ അത് സാധിക്കൂ. ഇത്തരത്തിലുള്ള ആദ്യ സമ്മേളനം 2012ല്‍ വൃന്ദാവനിലും 2019ല്‍ കോയമ്പത്തൂരുമായിരുന്നു. ഇത്തവണ ആദിശങ്കരന്റെ ജന്മഭൂമിയിലാണ്. മൂല്യാധിഷ്ഠിത വിദ്യാഭ്യാസം പകരുന്നതില്‍ ന്യാസിനു കടമയുണ്ട്, ഇതിനു ജ്ഞാനസഭയും ജ്ഞാനകുംഭയും മാത്രം പോരാ. ആഴത്തിലുള്ള പഠനവും പ്രവര്‍ത്തനവും മുന്നോട്ടുകൊണ്ടുപോകേണ്ടതുണ്ട്, കോത്താരി തുടര്‍ന്നു.
ഭാരതത്തിന്റെ പാരമ്പര്യവും അറിവുമാണ് നമ്മുടെ ഐക്യത്തിനു നിദാനമെന്നും ഇതിലൂടെ പരിവര്‍ത്തനമുണ്ടാക്കാമെന്നും അനുഗ്രഹ പ്രഭാഷണത്തില്‍ ചിന്മയമിഷന്‍ കേരളഘടകം അധ്യക്ഷന്‍ സ്വാമി വിവിക്താനന്ദ പറഞ്ഞു.
ഭാരതീയ ജ്ഞാന പാരമ്പര്യത്തിന്റെ അടിസ്ഥാനത്തില്‍ വിദ്യാഭ്യാസ പുനരുദ്ധാരണം ആവശ്യമാണെന്ന് ശിക്ഷ സംസ്‌കൃതി ഉത്ഥാന്‍ ന്യാസ് ദേശീയ അധ്യക്ഷ ഡോ. പങ്കജ് മിത്തല്‍ അഭിപ്രായപ്പെട്ടു. മുഴുവന്‍ മനുഷ്യരാശിയുടെ വികസനത്തിനുള്ള പാതയാണ് വിദ്യാഭ്യാസമെന്നതാണ് ഭാരതീയ സങ്കല്‍പം.
ഭാരതത്തിന്റെ വിദ്യാഭ്യാസ പരിവര്‍ത്തനവും ന്യാസ് പ്രവര്‍ത്തനവും വ്യത്യസ്ത പദ്ധതികളല്ല. വിദ്യാഭ്യാസത്തിലെ പ്രശ്‌നങ്ങള്‍ മാത്രമല്ല അതിനുള്ള പരിഹാരവും പുരോഗതിയും ലക്ഷ്യമിട്ടാണ് പ്രവര്‍ത്തിക്കുന്നത്, ഡോ. പങ്കജ് മിത്തല്‍ പറഞ്ഞു.
അടുത്ത അഞ്ചു വര്‍ഷത്തേക്കുള്ള ആസൂത്രണവും മുഖ്യകാര്യ പദ്ധതിയാണെന്നും ചര്‍ച്ചയില്‍ നിര്‍ദേശമുയര്‍ന്നു.
