ന്യൂദല്ഹി: മോദി അനില് അംബാനിയുടെ ആളാണെന്ന് ഒരു വട്ടമല്ല, ഒരായിരം വട്ടം വിമര്ശിച്ച ആളാണ് രാഹുല് ഗാന്ധി. പക്ഷെ അതേ അനില് അംബാനിയുടെ 50ഓഫീസുകളില് ഇഡി റെയ്ഡും അതിനു പിന്നാലെ സിബിഐ അന്വേഷണവും വരാനിരിക്കുകയാണ്. മോദി അനില് അംബാനിയെ രക്ഷിക്കുന്നുവെങ്കില് ഇത് നടക്കുമോ?
രാഹുല് ഗാന്ധിയുടെ അമ്മൂമ്മയായ ഇന്ദിരാഗാന്ധിയുടെ കാലത്ത് അത് നടന്നിരുന്നു. ധിരുഭായ് അംബാനിക്ക് കുത്തകമായി പല ബിസിനസുകളും പതിച്ചുകൊടുത്ത നേതാവാണ് ഇന്ദിരാഗാന്ധിയെന്നും അംബാനി ഗ്രൂപ്പ് കുത്തകയായി ഇന്ത്യയില് വളര്ന്നതിന് പിന്നില് രാഹുല് ഗാന്ധിയുടെ അമ്മൂമ്മയാണെന്നും അന്ന് ഹിന്ദു, ഇന്ത്യന് എക്സ്പ്രസ് എന്നീ പത്രങ്ങള് ശക്തമായി വിമര്ശനം ഉയര്ത്തിയിരുന്നു. പുതിയ കുറ്റങ്ങള് മോദിയ്ക്ക് മേല് ചാര്ത്തുക വഴി അമ്മൂമ്മയ്ക്ക് നേരെ ഉയര്ന്നിരുന്ന ആരോപണങ്ങള് മറയ്ക്കാമെന്നാണ് രാഹുല് ഗാന്ധി കരുതുന്നത്. എന്തായാലും മോദി സര്ക്കാരിന് കീഴില് നിയമം നിയമത്തിന്റെ വഴിക്കു പോകും. അതാണ് ഇഡി റെയ്ഡിലൂടെ വെളിപ്പെടുന്നത്. എട്ട് വര്ഷം മുന്പ് യെസ് ബാങ്കില് നിന്നും റിലയന്സ് ഹോം ഫിനാന്സിന് വേണ്ടി എടുത്ത 3000 കോടിയുടെ വായ്പ കടലാസുകമ്പനികളിലൂടെ വഴിതിരിച്ചുവിട്ടു എന്നതായിരുന്നു അനില് അംബാനിയ്ക്കെതിരായ കുറ്റം.
അനില് അംബാനിയെ മോദിയുമായി ബന്ധപ്പെടുത്തി രാഹുല് ഗാന്ധി നടത്തിയ വിമര്ശനങ്ങള് ഇനി രാഹുല് ഗാന്ധിയ്ക്ക് തിരിച്ചെടുക്കാന് സാധിക്കുമോ? മത്സ്യത്തൊഴിലാളികളെയും കര്ഷകരെയും മറന്ന്, അനില് അംബാനിയും നിരവ് മോദിയും പറയുന്നത് കേള്ക്കുന്ന ആളാണ് മോദിയെന്നാണ് രാഹുല് ഗാന്ധി പറഞ്ഞിരുന്നത്. ഇന്നത്തെ മോദി സര്ക്കാരില് അനില് അംബാനിയ്ക്ക് വലിയ സ്വാധീനമുണ്ടെന്നതാണ് രാഹുല് ഗാന്ധി നടത്തിയ മറ്റൊരു വിമര്ശനം. അനില് അംബാനി പറയുന്നത് 10 സെക്കന്റില് മോദി ചെയ്തുകൊടുക്കും എന്നതായിരുന്നു രാഹുല് ഗാന്ധിയുടെ മറ്റൊരു വിമര്ശനം.
അനില് അംബാനിയുടെ കമ്പനികള്ക്കെതിരെ ശക്തമായ നടപടികളാണ് നടന്നുകൊണ്ടിരിക്കുന്നത്. കഴിഞ്ഞ ദിവസം പാര്ലമെന്റില് അനില് അംബാനിയുടെ റിലയന്സ് കമ്മ്യൂണിക്കേഷന്സിന്റെ അക്കൗണ്ടിന് സ്റ്റേറ്റ് ബാങ്ക് ഓഫ് ഇന്ത്യ (എസ് ബി ഐ) തട്ടിപ്പ് മുദ്ര ചാര്ത്തിയെന്ന കാര്യം വെളിപ്പെടുത്തിയത് കേന്ദ്ര ധനകാര്യസഹമന്ത്രിയാണ്. അനില് അംബാനിയ്ക്കെതിരെ സ്റ്റേറ്റ് ബാങ്ക് ഓഫ് ഇന്ത്യ സിബിഐ നടപടി ആവശ്യപ്പെട്ടതായും കേന്ദ്ര ധനകാര്യ സഹമന്ത്രി അറിയിച്ചിരുന്നു. ഇനി രാഹുല് ഗാന്ധി മോദിയ്ക്കെതിരായ ഈ ഇല്ലാത്ത ആരോപണങ്ങള് പിന്വലിച്ച് മാപ്പ് പറയുമോ?
