കൊച്ചി: ശബരിമല ക്ഷേത്ര പരിസരത്ത് അയ്യപ്പസ്വാമിയുടെ പഞ്ചലോഹ വിഗ്രഹം സ്ഥാപിക്കാന്‍ സ്വകാര്യ വ്യക്തിക്ക് അനുമതി നല്‍കിയ തിരുവിതാംകൂര്‍ ദേവസ്വം ബോര്‍ഡിന്റെ നടപടി ഹൈക്കോടതി സ്റ്റേ ചെയ്തു. ഫണ്ട് സമാഹരണം സംബന്ധിച്ച് കിമിനല്‍ കേസ് രജിസ്റ്റര്‍ ചെയ്യാനും ശേഖരിച്ച ഫണ്ട് പിന്‍വലിക്കുന്നത് തടയാന്‍ ആവശ്യമായ നടപടി സ്വീകരിക്കാനും ശബരിമല ചീഫ് പോലീസ് കോ ഓര്‍ഡിനേറ്ററോട് ജസ്റ്റിസ് അനില്‍ കെ നരേന്ദ്രന്‍ , ജസ്റ്റിസ് മുരളീ കൃഷ്ണ എസ് എന്നിവരടങ്ങിയ ഡിവിഷന്‍ ബെഞ്ച് നിര്‍ദേശിച്ചു.
വിഗ്രഹം സ്ഥാപിക്കുന്നതിന് ദേവസ്വം ബോര്‍ഡ് അനുമതി നല്‍കിയിട്ടില്ലെന്നായിരുന്നു ദേവസ്വം ബോര്‍ഡിന്റെ സ്റ്റാന്‍ഡിംഗ് കോണ്‍സല്‍ ആദ്യം വാദിച്ചത്. ഇതേത്തുടര്‍ന്ന് ബന്ധപ്പെട്ട ഫയലുകള്‍ ഹാജരാക്കാന്‍ ദേവസ്വം ബോര്‍ഡിനോട് കോടതി നിര്‍ദ്ദേശിച്ചു. ബുധനാഴ്ച ഫയല്‍ ഹാജരാക്കിയപ്പോള്‍ ദേവസ്വം ബോര്‍ഡിന് സ്വകാര്യവ്യക്തി ഈ ആവശ്യം ചൂണ്ടിക്കാട്ടി അപേക്ഷ നല്‍കിയിരുന്നതായും ദേവസ്വം കമ്മീഷണറില്‍ നിന്ന് റിപ്പോര്‍ട്ട് തേടാതെ ദേവസ്വം ബോര്‍ഡ് പ്രസിഡന്റ് വിഗ്രഹം സ്ഥാപിക്കുന്നതിന് അനുമതി നല്‍കിയതായും വ്യക്തമായി. ഇക്കാര്യത്തില്‍ തന്ത്രിയുടെ അഭിപ്രായവും ബോര്‍ഡ് തേടിയില്ലെന്നത് ഞെട്ടിപ്പിക്കുന്നതാണെന്ന് കോടതി വിമര്‍ശിച്ചു.
