ന്യൂഡല്‍ഹി: ഇന്ത്യ, യുകെ സ്വതന്ത്ര വ്യാപാര കരാര്‍ വ്യാഴാഴ്ച ലണ്ടനില്‍ ഒപ്പുവയ്ക്കും. കരാറിന് കേന്ദ്ര മന്ത്രിസഭ അംഗീകാരം നല്‍കി. പ്രധാനമന്ത്രി നരേന്ദ്ര മോദി ഇതിനായി ലണ്ടനിലെത്തും. വാണിജ്യ വ്യവസായ മന്ത്രി പീയൂഷ് ഗോയലും പ്രധാനമന്ത്രിയെ അനുഗമിക്കും. കരാര്‍ പ്രാബല്യത്തില്‍ വരുന്നതോടെ ഇന്ത്യ കയറ്റുമതി ചെയ്യുന്ന 99 ശതമാനത്തോളം ഇനങ്ങള്‍ക്കും ബ്രിട്ടന്‍ നികുതി ഒഴിവാക്കും. പകരം ബ്രിട്ടനില്‍ നിന്ന് ഇറക്കുമതി ചെയ്യുന്ന 99 ശതമാനത്തോളം ഇനങ്ങള്‍ക്ക് ഇന്ത്യയും നികുതി ഒഴിവാക്കും. സ്വതന്ത്ര വ്യാപാര കരാറിന്‌റെ ഭാഗമായുള്ള സാമൂഹിക സുരക്ഷാ ഉടമ്പടിക്കായുള്ള ചര്‍ച്ചകളും പൂര്‍ത്തിയായി. ബ്രിട്ടനില്‍ കുറഞ്ഞകാലയളവില്‍ ജോലി ചെയ്യുന്ന ഇന്ത്യന്‍ പ്രൊഫഷണലുകള്‍ സാമൂഹിക സുരക്ഷാ ഫണ്ടുകളിലേക്ക് ഇരട്ടി തുക നല്‍കുന്നത് ഇതുവഴി ഒഴിവാകും.
2030 ആകുമ്പോഴേക്കും ഇരു സമ്പദ്വ്യവസ്ഥകളും തമ്മിലുള്ള വ്യാപാരം 120 ബില്യണ്‍ ഡോളറായി ഇരട്ടിയാക്കാന്‍ കരാര്‍ ലക്ഷ്യമിടുന്നു.
