കൊല്ലം: തൊഴില്‍ തേടി മൂന്ന് മാസം മുന്‍പ് വിദേശത്തേക്ക് പോയ അമ്മ സുജയെ മിഥുന്റെ ഷോക്കേറ്റുള്ള മരണം അറിയിക്കാനായിട്ടില്ല. കുവൈറ്റിലെ ഒരു വീട്ടില്‍ ഹോം നഴ്‌സായി ജോലിക്കു നില്‍ക്കുകയാണ് അവര്‍. ആ കുടുംബത്തോടൊപ്പം അവര്‍ തുര്‍ക്കിയിലേക്ക് യാത്ര പോയിരിക്കുകയാണ്. ഇതിനാലാണ് ബന്ധപ്പെടാന്‍ കഴിയാത്തത്. അതിനുള്ള ശ്രമങ്ങള്‍ നടക്കുന്നു. ബന്ധപ്പെട്ടാല്‍ തന്നെ എങ്ങിനെ ഇത്തരമൊരു ദാരുണ സംഭവം അറിയിക്കുമെന്ന ആശങ്കയിലാണ് പിതാവ് മനോജ്. മാത്രമല്ല, രണ്ട് മാസത്തേക്കാണ് ആ കുടുംബം യാത്ര പോയിരിക്കുന്നതെന്നാണ് അറിയുന്നത്. അങ്ങിനെയെങ്കില്‍ സുജയെ മാത്രമായി നാട്ടിലെത്തിക്കുക സങ്കീര്‍ണ്ണമാണ്.
അതിദരിദ്രമായ ജീവിത സാഹചര്യമാണ് മിഥുന്റെ കുടുംബത്തിന്റേത്. അതിനാല്‍ കുടുംബത്തിന് സ്‌കൗട്‌സ് ആന്‍ഡ് ഗൈഡ്‌സിന്റെ നേതൃത്വത്തില്‍ വീട് നിര്‍മ്മിച്ചു നല്‍കുമെന്ന് മന്ത്രി വി ശിവന്‍കുട്ടി അറിയിച്ചിട്ടുണ്ട് .
