കൊല്ലം : തേവലക്കരയില്‍ സ്‌കൂള്‍ വിദ്യാര്‍ത്ഥി വൈദ്യുതാഘാതമേറ്റ് മരിച്ച സംഭവത്തെ തുടര്‍ന്ന് കൊല്ലം ജില്ലയില്‍ വെളളിയാഴ്ച വിദ്യാഭ്യാസ ബന്ദിന് ആഹ്വാനം ചെയ്ത് എ ബി വി പി. കെ എസ് യുവും വിദ്യാഭ്യാസ ബന്ദിന് ആഹ്വാനം ചെയ്തിട്ടുണ്ട്.
തേവലക്കര ബോയ്സ് സ്‌കൂളിലെ എട്ടാം ക്ലാസ് വിദ്യാര്‍ത്ഥി മിഥുന്‍ വൈദ്യുതാഘാതമേറ്റ് മരിച്ചത് വിദ്യാഭ്യാസ,വൈദ്യുതി വകുപ്പുകളുടെ മാപ്പര്‍ഹിക്കാത്ത അനാസ്ഥ മൂലമാണെന്ന് എബിവിപി സംസ്ഥാന ജോയിന്റ് സെക്രട്ടറി ഗോകുല്‍ കൃഷ്ണന്‍ പറഞ്ഞു.കളിക്കുന്നതിനിടെ സൈക്കിള്‍ ഷെഡിന് മുകളില്‍ വീണ ചെരുപ്പെടുക്കാന്‍ കയറിയ വിദ്യാര്‍ത്ഥി താഴ്ന്നു കിടന്ന ഹൈ വോള്‍ട്ടേജ് ലൈനില്‍ നിന്ന് വൈദ്യുതാഘാതമേറ്റ് മരിച്ചത് അധികൃതരുടെ ഗുരുതരമായ കൃത്യവിലോപം തുറന്നു കാട്ടുന്നു. അപകടകരമായ വൈദ്യുതി ലൈന്‍ ഉയര്‍ത്താത്തത് ഒരേപോലെ സ്‌കൂള്‍ അധികൃതരുടെയും കെഎസ്ഇബി ജീവനക്കാരുടെയും വീഴ്ചയാണ്.
വകുപ്പുകള്‍ പരസ്പരം പഴിചാരുന്നത് അപഹാസ്യമാണ്. പൊതു വിദ്യാഭ്യാസ മേഖലയിലെ അഴിമതിക്കും കെടുകാര്യസ്ഥതയ്‌ക്കും കൂട്ടു നില്‍ക്കുന്ന വിദ്യാഭ്യാസ മന്ത്രി ഈ സംഭവത്തില്‍ കേരള പൊതുസമൂഹത്തോട് മറുപടി പറയാന്‍ ബാധ്യസ്ഥനാണെന്നും ഗോകുല്‍ കൃഷ്ണന്‍ കൂട്ടിച്ചേര്‍ത്തു.
പൊതുവിദ്യാലയങ്ങള്‍ ഹൈടെക്കാണെന്ന് വിദ്യാഭ്യാസ മന്ത്രി അവകാശപ്പെടുമ്പോള്‍ മറുവശത്ത് വിദ്യാര്‍ത്ഥികള്‍ പാമ്പ് കടിച്ചും വൈദ്യുതാഘാതമേറ്റും കൊല്ലപ്പെടുന്നത് മന്ത്രി കണ്ണുതുറന്ന് കാണണം, ശക്തമായ നടപടികളാണ് വേണ്ടത്. ആശ്വാസവാക്കുകളും സോഷ്യല്‍മീഡിയ ഗിമ്മിക്കുകളുമല്ല.മിഥുന്റെ മരണത്തില്‍ കുറ്റക്കാരായ ഉദ്യോഗസ്ഥര്‍ക്കെതിരെ നരഹത്യയ്‌ക്ക് കേസെടുക്കണമെന്നും ഗോകുല്‍ കൃഷ്ണന്‍ പറഞ്ഞു.
