ചെങ്ങന്നൂര്: ചെങ്ങന്നൂര് ക്രിസ്ത്യന് കോളജില് പോപ്പുലര് ഫ്രണ്ട്-ക്യാമ്പസ് ഫ്രണ്ട് ഭീകരവാദികളുടെ ആക്രമണത്തില് ധീരബലിദാനിയായ മുളക്കുഴ കോട്ട ശ്രീശൈലത്തില് വിശാലി (20) ന്റെ സ്മൃതിദിനം ഇന്ന്. രാവിലെ 7.30ന് സ്മൃതിമന്ദിരത്തില് പുഷ്പാര്ച്ചനക്കു ശേഷം നടന്ന സാംഘിക്കില് ഹിന്ദുഐക്യവേദി സംസ്ഥാന സംഘടനാ സെക്രട്ടറി സി. ബാബു അനുസ്മരണ പ്രഭാഷണം നടത്തി.
2012 ജൂലൈ 17ന് ചെങ്ങന്നൂര് ക്രിസ്ത്യന് കോളജില് നവാഗത വിദ്യാര്ത്ഥിക്ക് സ്വാഗതം ആശംസിക്കാന് എബിവിപി നടത്തിയ ചടങ്ങിനെത്തിയിരുന്നു നഗര് സമിതി പ്രസിഡന്റായിരുന്ന വിശാല്. അക്രമിസംഘം വിശാലിനെ തിരഞ്ഞുപിടിച്ച് മാരകമായി കുത്തിപ്പരിക്കേല്പ്പിച്ചു. ഉടന് ആശുപത്രിയില് എത്തിച്ചെങ്കിലും അടുത്ത ദിവസം പുലര്ച്ചെ കോട്ടയം മെഡിക്കല് കോളജില് വിശാലിന്റെ ജീവന് നഷ്ടമായി.
വിശാലിനൊപ്പമുണ്ടായിരുന്ന രണ്ട് എബിവിപി പ്രവര്ത്തകര്ക്കും ആക്രമണത്തില് ഗുരുതരമായി പരിക്കേറ്റു. ഇരുവര്ക്കും ദിവസങ്ങളോളം ആശുപത്രിയില് ചികിത്സയില് കഴിയേണ്ടിവന്നിരുന്നു. മാതാപിതാക്കള്ക്കൊപ്പം ഇംഗ്ലണ്ടില് പഠിക്കാനുള്ള അവസരം വേണ്ടെന്നുവെച്ചാണ് വിശാല് നാട്ടില് പഠിക്കാന് തീരുമാനിച്ചത്. നാടിനെ ഏറെ ഇഷ്ടപ്പെട്ടിരുന്ന വിശാല് നാട്ടുകാരുടെ പ്രിയപ്പെട്ടവനായിരുന്നു. ചെറുപ്രായത്തില് തന്നെ വീടിനു ചുറ്റുമുള്ളവരുടെ പ്രശ്നങ്ങളില് ഇടപെടുകയും പരിഹാരം കണ്ടെത്താന് ശ്രമിക്കുകയും ചെയ്തിരുന്നു.
പഠനത്തോടൊപ്പം ചിട്ടയായ പ്രവര്ത്തനത്തിലൂടെ എബിവിപിയിലേക്ക് നിരവധി വിദ്യാര്ത്ഥികളെ എത്തിക്കുന്നതിന് വിശാലിന് സാധിച്ചു. കോളജില് അക്കാലത്ത് ഇടതുപക്ഷ വിദ്യാര്ത്ഥികളുടെ ശക്തമായ പ്രവര്ത്തനമാണ് ഉണ്ടായിരുന്നത്. എതിരാളികളെ ആശയപരമായി നേരിടുന്നതിനു പകരം സംഘര്ഷത്തിലൂടെ ഇല്ലാതാക്കാനുള്ള ശ്രമമാണ് കൂടുതലും നടത്തിയിരുന്നത്. ഇവര്ക്കൊപ്പമായിരുന്നു ക്യാമ്പസ് ഫ്രണ്ടെന്ന ഭീകരവാദ സംഘടനയുടെ പ്രവര്ത്തനവും.
ദേശീയതയിലൂന്നിയുളള പ്രഭാഷണവും ഭാരതീയ സംസ്കാരത്തിലൂന്നിയുളള സംഘടനാ പ്രവര്ത്തനവും വിശാലിനെ ഇവരുടെ കണ്ണിലെ കരടാക്കി. ഭാവിയില് ദേശീയ പ്രസ്ഥാനങ്ങളുടെ നേതൃനിരയിലേക്ക് എത്തേണ്ട യുവത്വത്തെ മുളയിലെതന്നെ ഇല്ലാതാക്കാനുള്ള ആസൂത്രിത പദ്ധതി ആരുമറിയാതെ തീവ്രവാദ സംഘടനകള് നടപ്പിലാക്കിയപ്പോള് ഈ നാടിന് നഷ്ടമായത് കരുണാദ്രമായ മനസിനുടമയായ മികച്ച സംഘാടകനെയാണ്.
ആദ്യം ലോക്കല് പോലീസും പിന്നീട് സംസ്ഥാന സ്പെഷ്യല് ബ്രാഞ്ചും അന്വേഷിച്ച വിശാല് വധക്കേസിന്റെ വിചാരണ നടപടികള് മാവേലിക്കര അതിവേഗ കോടതിയില് അന്തിമഘട്ടത്തിലാണ്. പ്രോസിക്യൂഷന് സാക്ഷികളുടെ വിസ്താരം ഒരാഴ്ച കൊണ്ട് പൂര്ത്തിയായേക്കും. കേസ് നീട്ടിക്കൊണ്ടുപോകാന് പ്രതികള് നടത്തിയ ഇടപെടലുകളാണ് വിചാരണ നടപടികള് വൈകിപ്പിച്ചത്.
കേസില് 19 പ്രതികളാണുള്ളത്. അഡ്വ. പ്രതാപ് ജി. പടിക്കല് ആണ് സ്പെഷ്യല് പബ്ലിക് പ്രോസിക്യൂട്ടര്. സ്പെഷ്യല് പബ്ലിക് പ്രോസ്ക്യൂട്ടര് നിയമനം വൈകിപ്പിക്കാന് സര്ക്കാര് ശ്രമിച്ചതായും ആരോപണം ഉയര്ന്നിരുന്നു. പ്രതാപ് ജി. പടിക്കലിനെ സ്പെഷ്യല് പബ്ലിക് പ്രോസിക്യൂട്ടര് ആക്കണമെന്ന് വിശാലിന്റെ വീട്ടുകാര് ആവശ്യപ്പെട്ടെങ്കിലും ആദ്യം സര്ക്കാരിന് അനുകൂല നിലപാടായിരുന്നില്ല.
