തിരുവനന്തപുരം : സ്വകാര്യ ബസ് സമര മുന്നറിയിപ്പിന്റെ പശ്ചാത്തലത്തില്‍ ഉടമകളുമായി ഗതാഗത മന്ത്രി കെ.ബി ഗണേഷ് കുമാര്‍ നടത്തിയ ചര്‍ച്ച ഫലം കണ്ടില്ല. സമരവുമായി മുന്നോട്ടു പോകാനാണ് ഭൂരിഭാഗം സംഘടനകളുടെയും തീരുമാനം.ചര്‍ച്ചയെ തുടര്‍ന്ന് ബസ് ഓപ്പറേറ്റേഴ്സ് ഫോറം പണിമുടക്കില്‍ നിന്നും പിന്മാറി.
മണിക്കൂറുകള്‍ ചര്‍ച്ച നടന്നെങ്കിലും സമരം തുടരാനാണ് മൂന്ന് പ്രധാന സ്വകാര്യ ബസ് ഉടമകളുടെ സംഘടനകളും തീരുമാനിച്ചത്.140 കിലോമീറ്ററില്‍ അധികം ഓടുന്ന ബസുകളുടെ പെര്‍മിറ്റ് പുതുക്കി നല്‍കുക എന്നതാണ് പ്രധാന സമരാവശ്യം.
വിദ്യാര്‍ഥികളുടെ കണ്‍സഷന്‍ നിരക്ക് വര്‍ധിപ്പിക്കണം, ജീവനക്കാര്‍ക്ക് പൊലീസ് ക്ലിയറന്‍സ് നിര്‍ബന്ധമാക്കിയ തീരുമാനം പിന്‍വലിക്കണം എന്നിവയാണ് മറ്റ് ആവശ്യങ്ങള്‍.ഡ്രൈവര്‍, കണ്ടക്ടര്‍, ക്ലീനര്‍ എന്നിവര്‍ക്ക് പൊലീസ് ക്ലിയറന്‍സ് നിര്‍ബന്ധമാക്കുമെന്ന് മന്ത്രി പറഞ്ഞു. കണ്‍സെക്ഷന്‍ വിഷയത്തില്‍ ഉടന്‍ തന്നെ വിദ്യാര്‍ഥി സംഘടനകളുടെ പ്രതിനിധികളുമായി ചര്‍ച്ച നടത്തും. പുതിയ വാഹനങ്ങള്‍ കൊണ്ടുവരുന്നവര്‍ക്ക് മാത്രം പുതിയ പെര്‍മിറ്റ് നല്‍കുമെന്നും മന്ത്രി അറിയിച്ചു.
ഈ മാസം 22 മുതല്‍ അനിശ്ചിതകാല സമരം ആരംഭിക്കാനാണ് ബസുടമകളുടെ തീരുമാനം. ഈ മാസം ഏഴിന് സംയുക്ത സമരസമിതി സൂചന പണിമുടക്ക് നടത്തിയിരുന്നു.
