കോട്ടയം : കോട്ടയം മെഡിക്കല് കോളേജില് കെട്ടിടം തകര്ന്ന് സ്ത്രീ മരിച്ചതില് സര്ക്കാരിനെതിരെ പ്രതിഷേധം ശക്തമായിരിക്കെ മുഖ്യമന്ത്രി പിണറായി വിജയന് മെഡിക്കല് കോളേജില് എത്തി. പ്രതിഷേധം കണക്കിലെടുത്ത് അപകടസ്ഥലം സന്ദര്ശിക്കാതെ അദ്ദേഹം മടങ്ങി. അഞ്ച് മിനിറ്റോളം മാത്രമേ മുഖ്യമന്ത്രി മെഡിക്കല് കോളേജില് ഉണ്ടായിരുന്നുളളൂ.
ആരോഗ്യ മന്ത്രി വീണാ ജോര്ജ് മന്ത്രി വി എന് വാസവന് എന്നിവരുമായി കൂടിക്കാഴ്ച നടത്തി മടങ്ങുകയായിരുന്നു മുഖ്യമന്ത്രി.പറയാന് ഒന്നുമില്ലെന്നും എല്ലാം മന്ത്രിമാര് പറഞ്ഞെന്നും മുഖ്യമന്ത്രി പ്രതികരിച്ചു.
ശക്തമായ പ്രതിഷേധമാണ് മുഖ്യമന്ത്രിക്ക് നേരെ ഉണ്ടായത്. മെഡിക്കല് കോളേജിന് മുന്നില് മുഖ്യമന്ത്രിക്ക് നേരെ വിവിധ രാഷ്ട്രീയ കക്ഷികള് കരിങ്കൊടി കാണിച്ചു.
മകളുടെ ചികിത്സയ്ക്കെത്തിയ തലയോലപ്പറമ്പ് സ്വദേശി ബിന്ദുവാണ് ആശുപത്രിക്കെട്ടിടം തകര്ന്ന് മരിച്ചത്. രണ്ട് പേര്ക്ക് പരുക്കേറ്റു. 68 വര്ഷം പഴക്കമുള്ള കെട്ടിടം തകര്ന്നുവീണ് രണ്ടു മണിക്കൂറിനു ശേഷമാണ് ബിന്ദുവിനെ പുറത്തെടുത്തത്. അപകടത്തെകുറിച്ച് അന്വേഷിച്ച് റിപ്പോര്ട്ട് നല്കാന് ജില്ലാ കളക്ടറെ ചുമതലപ്പെടുത്തി.
മുത്തശ്ശിക്ക് കൂട്ടിരിക്കാന് എത്തിയ വയനാട് മീനങ്ങാടി സ്വദേശിനി പതിനൊന്നുകാരി അലീനാ വിന്സെന്റ്, കാഷ്വാലിറ്റി ജീവനക്കാരന് അമല് പ്രദീപ് എന്നിവര്ക്ക് അപകടത്തില് പരിക്കേറ്റു. കാലപ്പഴക്കവും ബലക്ഷയവും കാരണം കെട്ടിടം അടച്ചിട്ടിരിക്കുകയായിരുന്നുവെന്ന് അധികൃതര് പറയുന്നു.എന്നാല് രോഗികളും കൂട്ടിരിപ്പുകാരും ഇത് തളളി.
