പട്ന : ഭാരതത്തിന് അഭിമാനമായ അയോധ്യരാമക്ഷേത്രത്തിന് പിന്നാലെ ബിഹാറിൽ ജാനകീദേവിയ്‌ക്കായി ബൃഹദ് ക്ഷേത്രം ഒരുങ്ങുന്നു . മാതാ സീതയുടെ ജന്മസ്ഥലമായ സീതാമർഹി ജില്ലയിലെ പുണ്യസ്ഥലമായ പുനൗര സീതാദേവിയുടെ ക്ഷേത്രം നിർമ്മിക്കാൻ അംഗീകാരം നൽകിയത്. നിതീഷ് കുമാറിന്റെ നേതൃത്വത്തിലുള്ള എൻ‌ഡി‌എ മന്ത്രിസഭ ക്ഷേത്ര നിർമ്മാണത്തിനായുള്ള 882.87 കോടി രൂപയ്‌ക്ക് അംഗീകാരം നൽകി.
അയോധ്യയിലെ ശ്രീരാമ ജന്മഭൂമി ക്ഷേത്ര തീർത്ഥ ക്ഷേത്രത്തിന്റെ മാതൃകയിൽ ഈ സ്ഥലം വികസിപ്പിക്കും.“ജഗത് ജനനി മാ ജാനകിയുടെ ജന്മസ്ഥലമായ സീതാമർഹിയിലെ പുനൗര ധാമിന്റെ സമഗ്ര വികസനത്തിനായി ഒരു മഹത്തായ ക്ഷേത്രവും മറ്റ് ഘടനകളും നിർമ്മിക്കുന്നതിനുള്ള പദ്ധതി മന്ത്രിസഭ അംഗീകരിച്ചതായി അറിയിക്കുന്നതിൽ എനിക്ക് സന്തോഷമുണ്ട്.” – മുഖ്യമന്ത്രി നിതീഷ് കുമാർ എക്‌സിലെ പോസ്റ്റിൽ പറഞ്ഞു.
പദ്ധതിയുടെ പ്രവർത്തനങ്ങൾ വളരെ വേഗം ആരംഭിക്കുമെന്നും ഈ വർഷം ഓഗസ്റ്റിൽ ക്ഷേത്രത്തിന് ശിലാസ്ഥാപനം നടത്തുമെന്നും മുഖ്യമന്ത്രി പറഞ്ഞു . മാ ജാനകിയുടെ മഹത്തായ ക്ഷേത്രത്തിന്റെ നിർമ്മാണം എല്ലാ രാജ്യക്കാർക്കും പ്രത്യേകിച്ച് എല്ലാ ബിഹാറികൾക്കും ഭാഗ്യവും അഭിമാനവുമാണ്,” അദ്ദേഹം കൂട്ടിച്ചേർത്തു.അതേസമയം പ്രധാനമന്ത്രി നരേന്ദ്രമോദി ശിലാസ്ഥാപനത്തിന് എത്തുമെന്നും സൂചനയുണ്ട്.
ഈ വർഷം ഏപ്രിലിൽ റോഡ് ഗതാഗത, ഹൈവേ മന്ത്രാലയം അയോധ്യയെയും സീതാമർഹിയെയും ബന്ധിപ്പിക്കുന്ന 240 കിലോമീറ്റർ ദൈർഘ്യമുള്ള “രാം ജാനകി പാത (റൂട്ട്)” യുടെ അന്തിമ വിന്യാസത്തിന് അംഗീകാരം നൽകിയിരുന്നു. 6155 കോടി രൂപ ചെലവിൽ നിർമ്മിക്കുന്ന സാംസ്കാരിക പ്രാധാന്യമുള്ള പദ്ധതി അയോധ്യയിലെ രാമക്ഷേത്രത്തെയും ബീഹാറിലെ സീതാമർഹിയിലെ പുരൗണ ധാമിനെയും സിവാൻ, സരൺ ജില്ല വഴി ബന്ധിപ്പിക്കും. രാമായണവുമായി ബന്ധപ്പെട്ട മതപരമായി പ്രാധാന്യമുള്ള സ്ഥലങ്ങൾ സന്ദർശിക്കുന്ന ഭക്തർക്ക് രാം ജാനകി പാത റോഡ് മാർഗം പ്രയോജനപ്പെടും.
