കാൺപൂർ : ഉത്തർപ്രദേശിലെ കാൺപൂരിലെ ശിവ ക്ഷേത്രത്തിൽ മുസ്ലീം സ്ത്രീ ആരാധന നടത്തുന്ന വീഡിയോ സോഷ്യൽ മീഡിയയിൽ വൈറലാകുന്നു . ഗുരുതരാവസ്ഥയിൽ ചികിത്സയിലായിരുന്ന സഹോദരന്റെ ജീവൻ തിരികെ കിട്ടിയതിന് നന്ദി പറയാനെത്തിയ സ്ത്രീയുടേ ദൃശ്യങ്ങളാണ് വൈറലാകുന്നത് .
ക്ഷേത്രത്തിനടുത്തുള്ള ബിഎംസി ആശുപത്രിയിലാണ് ഇവരുടെ സഹോദരനെ പ്രവേശിപ്പിച്ചിരുന്നത് . അതീവ ഗുരുതരനിലയിലായ സമയത്ത് സഹോദരനു വേണ്ടി യുവതി ഈ ക്ഷേത്രത്തിലെത്തി പ്രാർത്ഥിച്ചിരുന്നു .
തുടർന്നാണ് സഹോദരൻ അപകടനില തരണം ചെയ്ത ശേഷം പ്രാർത്ഥിക്കാൻ എത്തിയത് . ബുർഖ അണിഞ്ഞ് ക്ഷേത്രത്തിൽ തൊഴുന്നത് കണ്ട് പരിസരത്തുള്ളവരാണ് ഈ ദൃശ്യങ്ങൾ പകർത്തിയത് . മന്ധ്ന പ്രദേശത്തു നിന്നുള്ളവരാണ് യുവതിയും കുടുംബവുമെന്ന് ആശുപത്രി ജീവനക്കാർ പറഞ്ഞു . അതേസമയം ഇതാണ് സനാതനധർമ്മത്തിന്റെ മഹത്വമെന്നും , ഏതൊരാളെയും ചേർത്ത് നിർത്താനാണ് ഹിന്ദുമതം പഠിപ്പിക്കുന്നതെന്നുമാണ് കമന്റുകൾ.
