ന്യൂദൽഹി: പ്രധാനമന്ത്രി നരേന്ദ്ര മോദി ജൂൺ 18 ന് തന്റെ പേരിൽ മറ്റൊരു റെക്കോർഡ് കരസ്ഥമാക്കാൻ പോകുന്നു. നാളെ ആരംഭിക്കുന്ന മൂന്ന് ദിവസത്തെ സന്ദർശനത്തിന്റെ അവസാന ഘട്ടത്തിൽ ജൂൺ 18 ന് പ്രധാനമന്ത്രി മോദി ക്രൊയേഷ്യയിലെത്തും. ഇതുവരെ ഒരു ഇന്ത്യൻ പ്രധാനമന്ത്രിയും ക്രൊയേഷ്യയിൽ ഔദ്യോഗിക സന്ദർശനം നടത്തിയിട്ടില്ല. ക്രൊയേഷ്യ സന്ദർശിക്കുന്ന ആദ്യ പ്രധാനമന്ത്രിയായിരിക്കും പ്രധാനമന്ത്രി മോദി.
ക്രൊയേഷ്യൻ പ്രധാനമന്ത്രി ആൻഡ്രെജ് പ്ലെൻകോവിച്ചിന്റെ ക്ഷണപ്രകാരമാണ് അദ്ദേഹം ഈ യൂറോപ്യൻ രാജ്യത്തേക്ക് ഔദ്യോഗിക സന്ദർശനം നടത്തുക. ക്രൊയേഷ്യൻ പ്രധാനമന്ത്രി പ്ലെൻകോവിച്ചുമായി പ്രധാനമന്ത്രി മോദി ഉഭയകക്ഷി കൂടിക്കാഴ്ച നടത്തുകയും പ്രസിഡന്റ് സോറൻ മിലാനോവിച്ചിനെ കാണുകയും ചെയ്യും.
അതേ സമയം കാനഡയിൽ നടക്കുന്ന ജി-7 ഉച്ചകോടിയിൽ പ്രധാനമന്ത്രി പങ്കെടുക്കും. പ്രധാനമന്ത്രി നരേന്ദ്ര മോദി ഞായറാഴ്ചയാണ് സൈപ്രസ്, കാനഡ, ക്രൊയേഷ്യ എന്നിവിടങ്ങളിലേക്ക് യാത്ര തിരിക്കുന്നത്. വിദേശകാര്യ മന്ത്രാലയം പറയുന്നതനുസരിച്ച് അദ്ദേഹം കാനഡയിൽ നടക്കുന്ന ജി7 ഉച്ചകോടിയിൽ പങ്കെടുക്കുകയും സൈപ്രസ്, ക്രൊയേഷ്യ എന്നിവയും സന്ദർശിക്കുകയും ചെയ്യും.
