അഹമ്മദാബാദ് : അപകടത്തില്‍ പെട്ട എയറിന്ത്യ വിമാനത്തിന്റെ പൈലറ്റ് സുമിത് സബര്‍ബാള്‍ എയര്‍ട്രാഫിക് കണ്‍ട്രോളിലേക്ക് ‘രക്ഷിയ്ക്കൂ’ എന്നാവശ്യപ്പെട്ടുകൊണ്ടുള്ള അപകടസന്ദേശം അയച്ചതായി വാര്‍ത്ത. 8200 മണിക്കൂറോളം വിമാനം പറപ്പിച്ചിട്ടുള്ള ഇത്രയ്‌ക്ക് അനുഭവസമ്പത്തുള്ള പൈലറ്റ് എന്തിനാണ് ഇത്തരമൊരു സന്ദേശം അയച്ചത്. അപകടത്തില്‍പെട്ട എയറിന്ത്യ വിമാനം
മെയ് ഡേ, മെയ് ഡേ, മെയ് ഡേ….എന്നായിരുന്നു സുമിത് സബര്‍ബാളിന്റെ സന്ദേശം. ഗുരുതരമായ അപകടത്തില്‍ പെടുമ്പോള്‍ മാത്രം പൈലറ്റുമാര്‍ അയക്കുന്ന സന്ദേശമാണിത്. മെയ് ഡേ എന്നാല്‍ ഹെല്‍പ് മി, ഹെല്‍പ് മി എന്നാണ് അര്‍ത്ഥം. എന്തിനാണ് പൈലറ്റ് ഇങ്ങിനെ ഒരു സന്ദേശം അയച്ചത് എന്നാണ് ചോദ്യമുയരുന്നത്. എന്താണ് കാര്യമെന്ന് തിരക്കി എയര്‍ട്രാഫിക് കണ്‍ട്രോളില്‍ നിന്നും തിരിച്ച് വിളിച്ചെങ്കിലും മറുപടിയുണ്ടായില്ല. അപ്പോഴേക്കും അപകടം നടന്നു കഴിഞ്ഞിരുന്നു.
അഹമ്മദാബാദില്‍ നിന്നും യുകെയിലേക്ക് പറക്കുകയായിരുന്ന എയറിന്ത്യയില്‍ 242 യാത്രക്കാരുണ്ടായിരുന്നു. ഇതില്‍ 133 പേരുടെ മരണം സ്ഥിരീകരിച്ചു. വിമാനത്താവളത്തില്‍ നിന്നും പറന്നുയര്‍ന്ന് 15 കിലോമീറ്റര്‍ ദൂരം താണ്ടുന്നതിനിടയില്‍ അപകടമുണ്ടായി. അഹമ്മദാബാദിലെ മേഘനാനഗറിനടുത്ത് ധര്‍പൂരിലാണ് വിമാനം പതിച്ചത്. ഉച്ചയ്‌ക്ക് 1.07 മണിക്കായിരുന്നു അപകടം. ഇവിടെ നിന്നും ഇപ്പോഴും പുക ഉയരുകയാണ്.
ആകെയുള്ള 232 യാത്രക്കാരിലും 10 ക്രൂ അംഗങ്ങളിലും 169 പേര്‍ ഇന്ത്യക്കാരാണ്.53 ബ്രിട്ടീഷുകാര്‍, ഒരു കാനഡിയന്‍ സ്വദേശി, ഏഴ് പോര്‍ച്ചുഗീസ് സ്വദേശികള്‍ എന്നിവരാണ് മറ്റ് യാത്രക്കാര്‍. ഫയര്‍ ബ്രിഗേഡ് ഇപ്പോഴും അവിടെ രക്ഷാപ്രവര്‍ത്തനം നടത്തുകയാണ്.
ആഭ്യന്തരമന്ത്രി അമിത് ഷായോടും വ്യോമയാന മന്ത്രി രാം മോഹന്‍ നായിഡുവിനോടും ഉടനെ അഹമ്മദാബാദില്‍ എത്താന്‍ പ്രധാനമന്ത്രി മോദി ആവശ്യപ്പെട്ടു.
