ന്യൂദൽഹി: ചൊവ്വാഴ്ച രാവിലെ തായ്‌ലൻഡിൽ നിന്ന് ന്യൂദൽഹിയിലേക്കുള്ള എയർ ഇന്ത്യ വിമാനം ആകാശചുഴിയിൽപ്പെട്ടു. ഇതേ തുടർന്നുണ്ടായ ശക്തമായ കാറ്റിലും കുലുക്കത്തിലും നിരവധി യാത്രക്കാർക്കും ജീവനക്കാർക്കും നിസ്സാര പരിക്കേറ്റു.
ഫൂക്കറ്റിൽ നിന്ന് ന്യൂദൽഹിയിലേക്ക് പറക്കുന്ന AI2379 എന്ന വിമാനമാണ് ആകാശചുഴിയിൽപ്പെട്ടത്. വിമാനം ദൽഹി ഇന്ദിരാഗാന്ധി അന്താരാഷ്‌ട്ര വിമാനത്താവളത്തിൽ ഇറങ്ങുന്നതിനിടെയായിരുന്നു അപകടം. വിമാനത്തിന്റെ ഉയരത്തിൽ പെട്ടെന്നുണ്ടായ മാറ്റമാണ് അപകടത്തിന് കാരണമായത്. എയർബസ് എ320 ഇനത്തിൽപ്പെട്ട വിമാനത്തിൽ 134 യാത്രക്കാരാണ് ഉണ്ടായിരുന്നത്. രാവിലെ 11 മണിക്ക് ശേഷമാണ് വിമാനം ദൽഹിയിൽ ലാൻഡ് ചെയ്തത്.
പരിക്കേറ്റ 10 ഓളം യാത്രക്കാരെയും രണ്ട് ജീവനക്കാരെയും വിമാനത്താവളത്തിലെ മേദാന്ത മെഡിക്കൽ സെന്ററിലേക്ക് മാറ്റി പരിശോധനയ്‌ക്കും ചികിത്സയ്‌ക്കും വിധേയരാക്കി.
