രണ്ട് പ്രധാന അണക്കെട്ടുകൾ വരണ്ടു തുടങ്ങിയിരിക്കുന്നു, വിളകൾ വിതയ്‌ക്കാൻ കഴിയുന്നില്ല; ഇന്ത്യയുടെ ജലയുദ്ധ തന്ത്രത്തിൽ പാകിസ്ഥാൻ ആടിയുലയുന്നു

കറാച്ചി : പഹൽഗാം ഭീകരാക്രമണത്തിന് ശേഷം ഇന്ത്യ സ്വീകരിച്ച ജല യുദ്ധ തന്ത്രം പാകിസ്ഥാനിൽ ജലപ്രതിസന്ധി സൃഷ്ടിച്ചു. ഇന്ത്യയുടെ ഈ നീക്കത്തിനുശേഷം സിന്ധു നദീതടത്തിലെ പാകിസ്ഥാന്റെ അണക്കെട്ടുകളിൽ നിന്നുള്ള വെള്ളത്തിന്റെ ഒഴുക്കിൽ ഗണ്യമായ കുറവുണ്ടായി. രാജ്യത്തുടനീളമുള്ള ജലസംഭരണികളുടെ ജലനിരപ്പ് അപകടകരമാം വിധം താഴ്ന്ന നിലയിലെത്തി. മംഗ്ല, തർബേല തുടങ്ങിയ പ്രധാന അണക്കെട്ടുകൾ വരണ്ടുണങ്ങിയതിനാൽ ജലസേചനത്തെ ബാധിക്കുകയും പ്രധാന വിളകളുടെ വിതയ്‌ക്കൽ നിർത്തിവയ്‌ക്കുമെന്ന സാഹചര്യം ഉടലെടുക്കുന്നു.

വാസ്തവത്തിൽ ഇന്ത്യ ചെനാബ് നദിയിലെ ജലപ്രവാഹം കുറച്ചതിനുശേഷം പാകിസ്ഥാനിലെ സിന്ധു നദിയിലെ ജലക്ഷാമം കഴിഞ്ഞ വർഷത്തെ അപേക്ഷിച്ച് അതിവേഗം വർദ്ധിച്ചുകൊണ്ടിരിക്കുകയാണ്. മംഗ്ല, തർബേല അണക്കെട്ടുകളിലെ ജലസംഭരണം പകുതിയിൽ താഴെയായി കുറഞ്ഞു എന്നതാണ് സ്ഥിതി. പഞ്ചാബിലെ സിയാൽകോട്ടിലെ മാറാലയിൽ സ്ഥിതി വളരെ ഗുരുതരമാണ്. ഇവിടെ ചെനാബ് നദിയുടെ ശരാശരി ഒഴുക്ക് മെയ് 28 ന് 26,645 ക്യുസെക്കിൽ നിന്ന് ജൂൺ 5 ന് 3.064 ക്യുസെക്കായി കുറഞ്ഞു.

വിളകൾക്ക് നദീതടങ്ങളിൽ നിന്ന് വെള്ളം ലഭ്യമല്ലാത്തതിനാൽ കർഷകർക്കിടയിൽ ആശങ്കയുടെ അലയൊലികൾ നിലനിൽക്കുന്നുണ്ട്. സിന്ധു-ഝലം നദികളിൽ നിന്ന് ചെനാബ് നദികളിലേക്കുള്ള നീരൊഴുക്ക് വളരെ കുറവാണ്. കടുത്ത ചൂടും വെള്ളത്തിന്റെ അഭാവവും കാരണം വയലുകളിൽ വിശാലമായ വിള്ളലുകൾ പ്രത്യക്ഷപ്പെട്ടു. ഈ വേനൽക്കാലത്ത് കടുത്ത ചൂടിനിടയിൽ പാകിസ്ഥാനിൽ മൺസൂൺ വൈകിയെത്തിയതിനാൽ ജലസേചന പ്രശ്നം കൂടുതൽ വർദ്ധിച്ചു. ജൂൺ അവസാനത്തോടെ മൺസൂൺ എത്താനുള്ള സാധ്യത കുറവാണ്, അതിനാൽ കർഷകർക്ക് ജലസേചനത്തിന് കടുത്ത ക്ഷാമം നേരിടേണ്ടി വന്നേക്കാം.

ഏപ്രിൽ 22-ന് പഹൽഗാം ആക്രമണത്തിനുശേഷമാണ് സിന്ധു നദീജല കരാർ ഇനി നടപ്പാക്കില്ലെന്ന് ഇന്ത്യ ഏപ്രിൽ 23-ന് പ്രഖ്യാപിച്ചത്. രക്തവും വെള്ളവും ഒരുമിച്ച് ഒഴുകാൻ കഴിയില്ല എന്ന് കേന്ദ്ര സർക്കാർ വ്യക്തമായി പറഞ്ഞിട്ടുണ്ട്. അതായത് പാകിസ്ഥാന്റെ മണ്ണിൽ നിന്നുള്ള തീവ്രവാദികൾ ഇന്ത്യയിൽ രക്തം ചിന്തുമ്പോൾ പാകിസ്ഥാന് വെള്ളം നൽകുന്നത് ദേശീയ താൽപ്പര്യങ്ങൾക്ക് വിരുദ്ധമാണെന്നാണ് കേന്ദ്രസർക്കാർ സൂചിപ്പിച്ചത്.