കോഴിക്കോട്: ബേപ്പൂര് തീരത്തിന് സമീപം അഗ്നിബാധയുണ്ടായ സിംഗപൂര് പതാക വഹിക്കുന്ന ചരക്കുകപ്പലായ വാന്ഹായ് 503 ല് നിന്നും രക്ഷിച്ച ക്യാപ്റ്റന് ഉള്പ്പടെ 18 ജീവനക്കാരെയും മംഗളൂരുവിലെത്തിച്ചു.
പൊളളലേറ്റ ആറ് ജീവനക്കാരെ ആശുപത്രിയില് പ്രവേശിപ്പിച്ചു.ഇതില് മൂന്ന് ചൈനീസ് പൗരന്മാരും ഒരു തായ് വാന് പൗരനും ഉള്പ്പെടുന്നു. രണ്ട് പേരുടെ നില ഗുരുതരമാണ്. ഇവര്ക്ക് 25 മുതല് 40 ശതമാനം വരെ പൊളളലേറ്റിട്ടുണ്ട്.
നാവികസേന കപ്പലായ ഐഎന്എസ് സൂറത്തിലാണ് ഇവരെ കരയിലെത്തിച്ചത്. അപകടത്തില് കാണാതായ നാലു ജീവനക്കാര്ക്ക് വേണ്ടിയുള്ള തിരച്ചില് തുടരുകയാണ്. അപകടത്തിലായ കപ്പലില് തീ ആളിപ്പടരുന്നു. നാവിക സേനയുടെയും തീര സംരക്ഷണ സേനയുടെയും കപ്പലുകള് അപകടസ്ഥലത്ത് എത്തി.തീപിടിച്ച ചരക്കുകപ്പലിലെ അപകടവസ്തുക്കള് ഉളള കണ്ടെയ്നറുകള് കടലില് വീഴുകയാണ്. ഈ കണ്ടെയ്നറുകള് കോഴിക്കോടിനും കൊച്ചിക്കും ഇടയിലുള്ള തീരത്ത് അടിഞ്ഞേക്കുമെന്നും കപ്പലില് നിന്നുള്ള എണ്ണ കടലില് കലര്ന്ന് തീരമേഖലയിലേക്ക് എത്താന് സാധ്യതയുണ്ടെന്നും മുന്നറിയിപ്പുണ്ട്. ഇത് വഴി കടന്നുപോകുന്ന മറ്റ് കപ്പലുകള്ക്ക് ജാഗ്രതാ നിര്ദ്ദേശം നല്കി.
