ഗാസ : സ്വീഡിഷ് വിവാദ ആക്ടിവിസ്റ്റ് ഗ്രെറ്റ തുൻബെർഗിനെയും 11 പലസ്തീൻ അനുകൂല പ്രചാരകരെയും കസ്റ്റഡിയിലെടുത്ത് ഇസ്രായേൽ . ഇവരെയും വഹിച്ചുകൊണ്ട് ഗാസ മുനമ്പിലേക്ക് വരികയായിരുന്ന മാഡ്ലീൻ എന്ന കപ്പലാണ് ഇസ്രായേൽ കസ്റ്റഡിയിലെടുത്തത് . കഴിഞ്ഞ ദിവസം തന്നെ ഇത് സംബന്ധിച്ച് ഇസ്രായേൽ മുന്നറിയിപ്പ് നൽകിയിരുന്നു . നാവിക ഉപരോധം ലംഘിക്കാൻ കപ്പൽ അനുവദിക്കില്ലെന്നും ഇസ്രായേൽ അറിയിച്ചു.
എന്ത് വില കൊടുത്തും ഈ യാത്ര നിർത്താൻ ഇസ്രായേൽ പ്രതിരോധ സേനയോട് ഉത്തരവിട്ടിട്ടുണ്ടെന്ന് പ്രതിരോധ മന്ത്രി ഇസ്രായേൽ കാറ്റ്‌സ് പറഞ്ഞു. മാനുഷിക സഹായമെന്ന പേരിൽ വേഷംമാറിയ പ്രകോപനപരമായ പ്രവൃത്തിയാണിതെന്ന് അദ്ദേഹം പറഞ്ഞു. കപ്പൽ നിലവിൽ ഈജിപ്റ്റിൽ നിന്ന് ഗാസയുടെ തീരത്തേക്ക് അടുക്കുകയാണ്.
കഴിഞ്ഞ ആഴ്ച സിസിലിയിൽ നിന്നാണ് യാത്ര പുറപ്പെട്ടത്. അതിൽ മാവ്, മെഡിക്കൽ കിറ്റുകൾ, ബേബി ഫുഡ് എന്നിവ ഉൾപ്പെടുന്നുവെന്നാണ് പറയപ്പെടുന്നത് . എന്നാൽ, യഥാർത്ഥ മാനുഷിക ആശങ്കകളേക്കാൾ രാഷ്‌ട്രീയ കാഴ്ചപ്പാടുകളുമായാണ് ഈ യാത്രയെന്ന് ഇസ്രായേൽ ഉദ്യോഗസ്ഥരും വിശകലന വിദഗ്ധരും പറയുന്നു. പ്രതിരോധ മന്ത്രി ഇസ്രായേൽ കാറ്റ്‌സ് യാത്രക്കാരെ “സെമറ്റിക് വിരുദ്ധ പ്രചാരകർ” എന്നും വിശേഷിപ്പിച്ചു.
““മഡലീൻ” എന്ന വിദ്വേഷ ഫ്ലോട്ടില്ല ഗാസയുടെ തീരത്ത് എത്തുന്നത് തടയാൻ നടപടിയെടുക്കാൻ ഞാൻ ഐഡിഎഫിനോട് നിർദ്ദേശിച്ചിട്ടുണ്ട് – അതിനായി ആവശ്യമായ എല്ലാ നടപടികളും സ്വീകരിക്കുക. സെമിറ്റിക് വിരുദ്ധരായ ഗ്രേറ്റയ്‌ക്കും അവരുടെ സഹ ഹമാസ് പ്രചാരണ വക്താക്കൾക്കും ഞാൻ വ്യക്തമായി പറയുന്നു: നിങ്ങൾ പിന്തിരിയണം – കാരണം നിങ്ങൾ ഗാസയിൽ എത്തില്ല. ഉപരോധം തകർക്കാനോ കടലിലും വായുവിലും കരയിലും തീവ്രവാദ സംഘടനകളെ സഹായിക്കാനോ ഉള്ള ഏതൊരു ശ്രമത്തിനെതിരെയും ഇസ്രായേൽ നടപടിയെടുക്കും.” ഇസ്രായേൽ കാറ്റ്‌സ് ട്വിറ്ററിൽ കുറിച്ചു.
ഗ്രേറ്റയെ കൂടാതെ, കപ്പലിൽ ഏറ്റവും വിവാദപരമായ വ്യക്തികളിൽ ഫ്രഞ്ച് എംഇപി റിമ ഹസ്സനും ഉൾപ്പെടുന്നു. ഒക്ടോബർ 7-ന് ഇസ്രായേലിനെതിരായ ഹമാസിന്റെ ഭീകരാക്രമണത്തെ “നിയമപരം” എന്ന് അവർ മുമ്പ് ന്യായീകരിച്ചിരുന്നു.
കർഷക സമരത്തിന്റെ പേരിൽ ഇന്ത്യൻ റിപ്പബ്ലിക് ദിനത്തിൽ തലസ്ഥാനത്ത് ചെങ്കോട്ടയുൾപ്പെടെയുള്ള സ്ഥലങ്ങളിൽ സംഘർഷം നടത്തിയതിനെ പിന്തുണച്ച് ഇന്ത്യാ വിരുദ്ധ ടൂൾ കിറ്റ് പങ്കുവെച്ച വ്യക്തിയാണ് ഗ്രേറ്റ . . ഇത് പ്രചരിപ്പിച്ചതിൽ ഖാലിസ്താൻ ഉൾപ്പെടെയുള്ള സംഘടനകൾക്കും പങ്കുണ്ടെന്നുള്ള വിവരങ്ങളും പുറത്തുവന്നിരുന്നു.
