ന്യൂഡൽഹി ; ബാങ്ക് തട്ടിപ്പ്, കള്ളപ്പണം വെളുപ്പിക്കൽ എന്നീ ആരോപണങ്ങളിൽ ഗുരുതരമായ വെളിപ്പെടുത്തലുമായി ഒളിവിൽ പോയ വ്യവസായി വിജയ് മല്യ . യൂട്യൂബർ രാജ് ഷംനിയുമായുള്ള പോഡ്കാസ്റ്റിൽ, അന്നത്തെ ധനമന്ത്രി പ്രണബ് മുഖർജി മുതൽ അരുൺ ജെയ്റ്റ്ലി വരെയുള്ള എല്ലാവരുടെയും പേരുകൾ വിജയ് മല്യ വെളിപ്പെടുത്തിയിട്ടുണ്ട്.
കിംഗ്ഫിഷർ എയർലൈൻസിന്റെ തകർച്ചയ്ക്ക് കാരണമെന്താണെന്നും മല്യ വിശദീകരിച്ചു. 2008 ലെ ആഗോള സാമ്പത്തിക പ്രതിസന്ധിയാണ് എയർലൈനിന്റെ തകർച്ചയ്ക്ക് കാരണമെന്ന് വിജയ് മല്യ പറഞ്ഞു. എയർലൈൻ പ്രതിസന്ധി നേരിട്ടപ്പോൾ, പരിഹാരത്തിനായി പ്രണബ് മുഖർജിയെ സമീപിച്ചിരുന്നുവെന്ന് അദ്ദേഹം പറഞ്ഞു.
‘ 2005 ലാണ് കിംഗ്ഫിഷർ എയർലൈൻസ് ആരംഭിച്ചത്. മൂന്ന് വർഷത്തിന് ശേഷം ലോകം സാമ്പത്തിക പ്രതിസന്ധിയുടെ പിടിയിലായി. പണം വരുന്നത് നിലച്ചു, കിംഗ്ഫിഷർ എയർലൈൻസിനെയും അത് ബാധിച്ചു. ഞാൻ അന്നത്തെ ധനമന്ത്രി പ്രണബ് മുഖർജിയെ കാണാൻ പോയി. എയർലൈനിന്റെ പ്രവർത്തനം കുറയ്ക്കേണ്ടിവരുമെന്ന് ഞാൻ അദ്ദേഹത്തോട് പറഞ്ഞു.
വിമാനങ്ങളുടെ എണ്ണം കുറയ്ക്കുകയും ജീവനക്കാരെ പിരിച്ചുവിടുകയും ചെയ്യേണ്ടിവരുമെന്ന് ഞാൻ പ്രണബ് മുഖർജിയോട് പറഞ്ഞിരുന്നു. ഇത്രയും മോശം സാമ്പത്തിക സാഹചര്യത്തിൽ വിമാന സർവീസുകളുടെ റിസ്ക് എടുക്കാൻ എനിക്ക് കഴിയില്ല’ എന്നും പറഞ്ഞു.
എന്നാൽ എയർലൈനിന്റെ പ്രവർത്തനം കുറയ്ക്കരുതെന്ന് പ്രണബ് മുഖർജി പറഞ്ഞു, ബാങ്കുകൾ സഹായിക്കുമെന്ന് ഉറപ്പുനൽകി. ഇങ്ങനെയാണ് എല്ലാം ആരംഭിച്ചത് – വിജയ് മല്യ പറഞ്ഞു. ഇതെല്ലാം ഉണ്ടായിരുന്നിട്ടും, കിംഗ്ഫിഷർ എയർലൈൻസ് ഒടുവിൽ സാമ്പത്തിക പ്രതിസന്ധിയിൽ കുടുങ്ങിയെന്നും അതിന്റെ എല്ലാ വിമാനങ്ങളും നിർത്തേണ്ടി വന്നെന്നും മല്യ പറഞ്ഞു.
