പൂനെ ; വീർ സവർക്കറുടെ കൊച്ചുമകനായ സത്യകി സവർക്കറുടെ മാതൃപരമ്പരയെക്കുറിച്ച് വിവരങ്ങൾ തേടി കോൺഗ്രസ് നേതാവ് രാഹുൽ ഗാന്ധി സമർപ്പിച്ച ഹർജി പൂനെ കോടതി തള്ളി. വീർ സവർക്കറിനെക്കുറിച്ച് അപമാനകരമായ പരാമർശം നടത്തിയതിന് സത്യകി ലണ്ടനിൽ ഫയൽ ചെയ്ത മാനനഷ്ടക്കേസിന്റെ ഭാഗമായിരുന്നു ഈ ഹർജി.
ജുഡീഷ്യൽ മജിസ്‌ട്രേറ്റ് (ഫസ്റ്റ് ക്ലാസ്) അമോൽ ഷിൻഡെയാണ് അപേക്ഷ തള്ളിയത് . ഇത്തരത്തിൽ വിവരങ്ങൾ നൽകേണ്ട കാര്യമില്ലെന്നും, രാഹുൽ ഗാന്ധിയുടെ ഹർജിയ്‌ക്ക് കേസുമായി യാതൊരു ബന്ധവുമില്ലെന്നും രാഹുൽ ഗാന്ധി ലണ്ടനിൽ നടത്തിയ അപകീർത്തികരമായ പ്രസംഗത്തെക്കുറിച്ചാണ് കേസെന്നും, സവർക്കർ കുടുംബ പാരമ്പര്യത്തെക്കുറിച്ചല്ലെന്നും കോടതി പറഞ്ഞു.
“അവർ (സവർക്കറും സുഹൃത്തുക്കളും) ഒരു മുസ്ലീമിനെ മർദിച്ചു, അതിൽ സന്തോഷം തോന്നി. അഞ്ച് പേർ ഒരാളെ മർദിച്ചപ്പോൾ ഒരാൾ സന്തോഷിക്കുന്നത് ഭീരുത്വമാണ്. സവർക്കർജിയോടൊപ്പം പതിനഞ്ച് പേർ ഒരാളെ മർദിക്കുന്നു. ഇത് അവരുടെ പ്രത്യയശാസ്ത്രത്തിലും ഉണ്ട്” എന്ന് രാഹുൽ ഗാന്ധി ലണ്ടനിൽ നടത്തിയ പ്രസംഗവുമായി ബന്ധപ്പെട്ടാണ് കേസ്.
