നൂഹ് : പാകിസ്ഥാന് വേണ്ടി ചാരവൃത്തി നടത്തിയെന്നാരോപിച്ച് ഹരിയാനയിലെ നൂഹ് പോലീസ് ഒരാളെ അറസ്റ്റ് ചെയ്തു. ഹരിയാനയിലെ മേവത് ജില്ലയിലെ തൗരു തഹ്സിലിലെ കംഗാർക്ക ഗ്രാമത്തിൽ താമസിക്കുന്ന മുഹമ്മദ് താരിഫ് ആണ് അറസ്റ്റിലായത്. കുറ്റാരോപിതനായ താരിഫിനും പാകിസ്ഥാൻ ഹൈക്കമ്മീഷനിലെ രണ്ട് ജീവനക്കാർക്കുമെതിരെ തൗരു സദർ പോലീസ് സ്റ്റേഷനിൽ നുഹ് പോലീസ് കേസ് രജിസ്റ്റർ ചെയ്തു.
അതേ സമയം നുഹ് ജില്ലയിലെ പാകിസ്ഥാൻ ചാരവൃത്തി ശൃംഖലയ്ക്കെതിരെ ഹരിയാന പോലീസും കേന്ദ്ര അന്വേഷണ ഏജൻസികളും വലിയ നടപടി സ്വീകരിച്ചിട്ടുണ്ട്. നേരത്തെ രജക നിവാസിയായ അർമാനെയും രണ്ട് ദിവസം മുമ്പ് അറസ്റ്റ് ചെയ്തിരുന്നു. ചാരവൃത്തി ആരോപിച്ച് സമാനമായ കുറ്റത്തിന് അർമാനെയും അറസ്റ്റ് ചെയ്തത്.
ഇന്ത്യൻ സൈന്യത്തെയും മറ്റ് സൈനിക പ്രവർത്തനങ്ങളെയും കുറിച്ചുള്ള വിവരങ്ങൾ ദൽഹിയിലെ പാകിസ്ഥാൻ ഹൈക്കമ്മീഷനിലെ ഒരു ജീവനക്കാരനുമായി അർമാൻ പങ്കുവച്ചതായി പോലീസ് കണ്ടെത്തിയിരുന്നു. തുടർന്ന് പ്രാദേശിക കോടതി അർമാനെ ആറ് ദിവസത്തെ പോലീസ് കസ്റ്റഡിയിൽ വിട്ടു.
കേന്ദ്ര അന്വേഷണ ഏജൻസികളിൽ നിന്നുള്ള വിവരങ്ങളെ തുടർന്നാണ് ഇയാളെ അറസ്റ്റ് ചെയ്തതെന്ന് പോലീസ് പറഞ്ഞു. വാട്ട്സ്ആപ്പും മറ്റ് സോഷ്യൽ മീഡിയ പ്ലാറ്റ്ഫോമുകളും ഉപയോഗിച്ച് വളരെക്കാലമായി തന്ത്രപ്രധാനമായ വിവരങ്ങൾ പങ്കുവെച്ചിരുന്നതായി റിപ്പോർട്ടുണ്ട്. ഇയാളുടെ മൊബൈൽ ഫോൺ പരിശോധിച്ചപ്പോൾ പാകിസ്ഥാൻ ഫോൺ നമ്പറുകളുമായി പങ്കിട്ട സംഭാഷണങ്ങൾ, ഫോട്ടോഗ്രാഫുകൾ, വീഡിയോകൾ എന്നിവ കണ്ടെത്തിയതായി പോലീസ് പറഞ്ഞു.
അതേ സമയം ഓപ്പറേഷൻ സിന്ദൂർ ആരംഭിച്ചതിനുശേഷം പാകിസ്ഥാനു വേണ്ടി ചാരവൃത്തി നടത്തിയെന്നാരോപിച്ച് ആകെ പതിനൊന്ന് പേരെ അറസ്റ്റ് ചെയ്തിട്ടുണ്ട്.
പിടിയിലായ ചാരൻമാർ
ജ്യോതി മൽഹോത്ര (ഹരിയാന)
അർമാൻ (നുഹ്, ഹരിയാന)
താരിഫ് (നുഹ്, ഹരിയാന)
ദേവേന്ദ്ര സിംഗ് ധില്ലൻ (കൈതൽ, ഹരിയാന)
മുഹമ്മദ് മുർതാസ അലി (ജലന്ധർ, പഞ്ചാബ്)
ഗസാല (പഞ്ചാബ്)
യാസീൻ മുഹമ്മദ് (പഞ്ചാബ്)
സുഖ്പ്രീത് സിംഗ് (ഗുർദാസ്പൂർ, പഞ്ചാബ്)
കരൺബീർ സിംഗ് (ഗുർദാസ്പൂർ, പഞ്ചാബ്)
ഷഹ്സാദ് (മൊറാദാബാദ്, യുപി)
നൊമാൻ ഇലാഹി (കൈരാന, യുപി)
