ധാക്ക : ദുർബലമായ സമ്പദ്‌വ്യവസ്ഥയെ പിന്തുണയ്‌ക്കുന്നതിനായി 762 മില്യൺ യുഎസ് ഡോളർ സാമ്പത്തിക സഹായം വർദ്ധിപ്പിക്കണമെന്ന് ബംഗ്ലാദേശ് അന്താരാഷ്‌ട്ര നാണയ നിധിയോട് (ഐഎംഎഫ്) ആവശ്യപ്പെട്ടു. ഇത് സംഭവിച്ചാൽ വിവിധ തലത്തിൽ ബംഗ്ലാദേശിനുള്ള മൊത്തം സാമ്പത്തിക സഹായം ഏകദേശം 4.1 ബില്യൺ യുഎസ് ഡോളറിലെത്തും.
പി‌ടി‌ഐ റിപ്പോർട്ട് പ്രകാരം എക്സ്റ്റെൻഡഡ് ക്രെഡിറ്റ് ഫെസിലിറ്റി (ഇസിഎഫ്), എക്സ്റ്റെൻഡഡ് ഫണ്ട് ഫെസിലിറ്റി (ഇഎഫ്എഫ്), റെസിലിയൻസ് ആൻഡ് സ്റ്റെബിലിറ്റി ഫെസിലിറ്റി (ആർ‌എസ്‌എഫ്) എന്നിവയ്‌ക്ക് കീഴിലുള്ള സംയുക്ത മൂന്നാമത്തെയും നാലാമത്തെയും അവലോകനങ്ങൾ പൂർത്തിയാക്കുന്നതിന് ആവശ്യമായ നയങ്ങളെക്കുറിച്ച് ഐഎംഎഫ് സ്റ്റാഫും ബംഗ്ലാദേശ് ഉദ്യോഗസ്ഥരും ധാരണയിലെത്തിയിട്ടുണ്ട്. ഐഎംഎഫ് എക്സിക്യൂട്ടീവ് ബോർഡിന്റെ അംഗീകാരത്തിനായി കാത്തിരിക്കുന്ന സ്റ്റാഫ് ലെവൽ കരാറാണിത്.
നികുതി പരിഷ്കാരങ്ങൾ, പൂർണ്ണ വിനിമയ നിരക്ക് ഉദാരവൽക്കരണം എന്നിവയുൾപ്പെടെയുള്ള മുൻകൂർ നടപടികളെ അടിസ്ഥാനമാക്കിയാണ് ഇത് നിർമ്മിച്ചിരിക്കുന്നതെന്ന് ഐഎംഎഫ് പ്രസ്താവനയിൽ പറഞ്ഞു. കാര്യമായ മാക്രോ ഇക്കണോമിക് വെല്ലുവിളികൾക്കിടയിലും, ഇസിഎഫ്, ഇഎഫ്എഫ് ക്രമീകരണങ്ങൾക്ക് കീഴിൽ എസ്ഡിആർ (സ്പെഷ്യൽ ഡ്രോയിംഗ് റൈറ്റ്സ്) വഴി ബംഗ്ലാദേശിനുള്ള ഐഎംഎഫ് സാമ്പത്തിക സഹായം 567.2 മില്യൺ (ഏകദേശം 762 മില്യൺ യുഎസ് ഡോളർ) വർദ്ധിപ്പിക്കാൻ ബംഗ്ലാദേശ് ഉദ്യോഗസ്ഥർ അഭ്യർത്ഥിച്ചതായി ബംഗ്ലാദേശിനായുള്ള ഐഎംഎഫ് മിഷൻ ചീഫ് ക്രിസ് പാപാജെർജിയോ പറഞ്ഞു.
ബംഗ്ലാദേശിലുണ്ടായ ജനകീയ പ്രക്ഷോഭത്തിന്റെ ആഘാതത്തിൽ 2025 സാമ്പത്തിക വർഷത്തിന്റെ ആദ്യ പകുതിയിൽ യഥാർത്ഥ ജിഡിപി വളർച്ച വാർഷികാടിസ്ഥാനത്തിൽ (വർഷം തോറും) 3.3 ശതമാനമായി കുറഞ്ഞുവെന്ന് ഐഎംഎഫ് പറഞ്ഞു.
