ന്യൂദൽഹി ; നാഷണല് ഹെറാള്ഡ് കേസില് സോണിയ ഗാന്ധിക്കും രാഹുല് ഗാന്ധിക്കുമെതിരെ കുറ്റപത്രം സമര്പ്പിച്ച് എന്ഫോഴ്സ്മെന്റ് ഡയറക്ടറേറ്റ്. കേസില് സോണിയ ഒന്നാം പ്രതിയും രാഹുൽ രണ്ടാം പ്രതിയുമാണ്. ഒാവര്സീസ് കോണ്ഗ്രസ് അധ്യക്ഷന് സാം പിത്രോദയ്ക്കെതിരെയും ഇഡി കുറ്റപത്രം സമര്പ്പിച്ചിട്ടുണ്ട്. കള്ളപ്പണം വെളുപ്പിക്കല് ഉള്പ്പെടെയുള്ള കുറ്റങ്ങളാണ് ഇഡി കേസില് ചുമത്തിയിരിക്കുന്നത്. കേസില് 25ന് റൗസ് അവന്യു കോടതി വാദം കേള്ക്കും.
നാഷണല് ഹെറാള്ഡ് കേസുമായി ബന്ധപ്പെട്ട് സോണിയ ഗാന്ധിയെയും രാഹുല് ഗാന്ധിയെയും ഇഡി നേരത്തേ ചോദ്യംചെയ്തിരുന്നു. കഴിഞ്ഞ ശനിയാഴ്ച നാഷണല് ഹെറാള്ഡിന്റെ 661 കോടി രൂപയുടെ സ്വത്ത് കണ്ടുകെട്ടാനുള്ള നടപടികളും ഇഡി ആരംഭിച്ചിരുന്നു. ഇതിനുപിന്നാലെയാണ് കേസില് കുറ്റപത്രം സമര്പ്പിച്ചിരിക്കുന്നത്.
