തൃശൂര്: പാലിയേക്കര ടോള്പ്ലാസയില് കാര് നിര്ത്തിയിട്ട് സംഘര്ഷമുണ്ടാക്കിയ യാത്രക്കാര്ക്കെതിരെ കേസെടുത്തു. ഞായറാഴ്ച വെളുപ്പിന് 1.30 ഓടെയായിരുന്നു സംഭവം.
കാര് ടോള്ബൂത്ത് കടന്ന ശേഷം ട്രാക്കില് നിര്ത്തിയിട്ട് ജീവനക്കാരെ അസഭ്യം പറയുകയും കൈയേറ്റം ചെയ്യാന് ശ്രമിക്കുകയുമായിരുന്നു. ടോള്പ്ലാസയിലെ ട്രാക്കുകളില് കാര് മാറ്റിമാറ്റിയിട്ട് ഇവര് പ്രശ്നമുണ്ടാക്കി.
ഇത് ചോദ്യം ചെയ്ത ജീവനക്കാരെ കാറിന്റെ ജാക്കി ലിവര് ഉപയോഗിച്ച് ആക്രമിക്കാന് ശ്രമിച്ചെന്നും പൊലീസ് പറഞ്ഞു. ടോള് അധികൃതര് അറിയിച്ച പ്രകാരം പൊലീസ് സ്ഥലത്തെത്തിയതോടെ ഇവര് കാറുമായി കടന്നു.
തുടര്ന്ന് സംഭവത്തിന്റെ സിസിടിവി ദൃശ്യങ്ങള് സഹിതം ടോള്പ്ലാസ അധികൃതര് പുതുക്കാട് പൊലീസില് പരാതി നല്കി.
