തിരുവനന്തപുരം: കാന്സര് പ്രതിരോധത്തിനും ചികിത്സയ്ക്കുമായി ആരോഗ്യ വകുപ്പ് നടപ്പാക്കുന്ന ‘ആരോഗ്യം ആനന്ദം-അകറ്റാം അര്ബുദം’ ജനകീയ കാന്സര് പ്രതിരോധ ക്യാമ്പയിനില് സംസ്ഥാനത്തെ 1321 സര്ക്കാര് ആശുപത്രികളില് സ്ക്രീനിംഗിനായുള്ള സംവിധാനങ്ങളൊരുക്കിയിട്ടുണ്ടെന്ന് അധികൃതര് അറിയിച്ചു. 1,10,388 പേര് ഇതിനകം കാന്സര് സ്ക്രീനിംഗ് നടത്തി. ഒരു വര്ഷം നീണ്ടുനില്ക്കുന്ന പ്രവര്ത്തനങ്ങളാണ് ആരോഗ്യ വകുപ്പ് ആസൂത്രണം ചെയ്തിട്ടുള്ളത്. അതിന്റെ ആദ്യഘട്ട ക്യാമ്പയിന് സ്ത്രീകള്ക്ക് വേണ്ടിയുള്ളതാണ്. സ്ത്രീകളെ പ്രധാനമായി ബാധിക്കുന്ന സ്തനാര്ബുദം, ഗര്ഭാശയഗള കാന്സര് എന്നിവയോടൊപ്പം മറ്റ് കാന്സറുകളും സ്ക്രീനിംഗ് നടത്തുന്നുണ്ട്. സ്ക്രീന് ചെയ്തതില് 5185 പേരെ കാന്സര് സംശയിച്ച് തുടര് പരിശോധനയ്ക്ക് റഫര് ചെയ്തു. പരിശോധനയില് കാന്സര് സ്ഥിരീകരിക്കുന്നവര്ക്ക് ചികിത്സയും തുടര് പരിചരണവും ലഭ്യമാക്കും.
സര്ക്കാര്, സ്വകാര്യ, സഹകരണ മേഖലകള്, സന്നദ്ധ പ്രവര്ത്തകര്, സംഘടനകള്, പൊതുസമൂഹം തുടങ്ങി എല്ലാവരും സഹകരിച്ച് കൊണ്ടാണ് ക്യാമ്പയിന് സംഘടിപ്പിക്കുന്നത്. പല കാന്സറുകളും വളരെ നേരത്തെ കണ്ടെത്തി ചികിത്സിച്ചാല് ഭേദമാക്കാന് സാധിക്കും. വ്യക്തികള്ക്കും പ്രിയപ്പെട്ടവര്ക്കും ഉണ്ടാകുന്ന പ്രയാസങ്ങള് കുറയുകയും ചെയ്യും. ഇത് മുന്നില് കണ്ടാണ് സംസ്ഥാന ആരോഗ്യ വകുപ്പ് പൊതുജന പങ്കാളിത്തത്തോടെ കാന്സര് പ്രതിരോധത്തിനും ചികിത്സയ്ക്കുമായി ജനകീയ കാന്സര് ക്യാമ്പയിന് ആരംഭിച്ചത്.
ബിപിഎല് വിഭാഗക്കാര്ക്ക് പൂര്ണമായും സൗജന്യമായിട്ടാണ് പരിശോധന. എപിഎല് വിഭാഗക്കാര്ക്ക് മിതമായ നിരക്കിലും പരിശോധനാ സൗകര്യം ഒരുക്കിയിട്ടുണ്ട്.
