തിരുവനന്തപുരം : ബാലരാമപുരത്തെ രണ്ട് വയസുകാരിയുടെ കൊലപാതകത്തിന് പിന്നിലെ കാരണം കണ്ടെത്താനുളള ശ്രമത്തിലാണ് പൊലീസ്. ഇതിന്റെ ഭാഗമായാണ് കുടുംബവുമായി ബന്ധമുളള ജ്യോത്സ്യന്‍ ശംഖുംമുഖം ദേവീദാസനെ കസ്റ്റഡിയിലെടുത്തത്. ശംഖുംമുഖം ദേവീദാസന്‍ പല ഘട്ടങ്ങളിലായി 30 ലക്ഷം രൂപ തട്ടിയെടുത്തെന്ന ശ്രീതുവിന്റെ മൊഴിയെ തുടര്‍ന്നാണ് ജ്യോത്സ്യനെ കസ്റ്റഡിയിലെടുത്തത്.
ശ്രീതുവിന്റെ ആത്മീയ ഗുരുവാണ് ഇദ്ദേഹം. ഇയാളുടെ കൂടെ മന്ത്രവാദങ്ങളില്‍ സഹായിയായി ശ്രീതു പോയിരുന്നു. കൊലപാതകം ചെയ്‌തെന്ന് കുറ്റസമ്മതം നടത്തിയ ശ്രീതുവിന്റെ സഹോദരന്‍ ഹരികുമാറും ശംഖുംമുഖം ദേവീദാസനൊപ്പം ജോലി ചെയ്തിരുന്നു.
കരിക്കകം സ്വദേശിയായ ശംഖുമുഖം ദേവീദാസന്‍ മുമ്പ് പാരലല്‍ കോളേജ് അധ്യാപകനായിരുന്നു. പ്രദീപ് കുമാറെന്നാണ് യഥാര്‍ത്ഥ പേര്. പിന്നീട് എസ് പി കുമാര്‍ എന്ന പേരില്‍ കാഥികനായി.്അതിന് ശേഷം പലചരക്കുകട തുടങ്ങി. ഇടക്കാലത്ത് മുട്ടക്കച്ചവടവും തുടങ്ങി. അതിനാല്‍ മുട്ട സ്വാമിയെന്ന പേരിലും അറിയപ്പെടുന്നു.
കരിക്കകത്ത് മൂകാംബിക ജ്യോതിഷാലയം തുടങ്ങിയത് ഇതിനൊക്കെ ശേഷമാണ്.ഇദ്ദേഹത്തിന്റെ വീട്ടിലടക്കം ആളുകള്‍ പ്രശ്‌നപരിഹാരങ്ങള്‍ക്കായി എത്തുമായിരുന്നു.
