തിരുവനന്തപുരം : ശ്രീതുവും ഹരികുമാറും ഇതുവരെ വീട്ടില് വന്നിട്ടില്ലെന്ന് ബാലരാമപുരത്തെ രണ്ടു വയസുകാരിയുടെ മരണവുമായി ബന്ധപ്പെട്ട് പൊലീസ് കസ്റ്റഡിയിലെടുത്ത ജ്യോത്സ്യന് ശംഖുംമുഖം ദേവീദാസന്റെ ഭാര്യ ശാന്ത.ജ്യോതിഷം മാത്രമാണ് കരിക്കകത്തുളള മൂകാംബിക ജ്യോതിഷാലയത്തില് പഠിപ്പിക്കുന്നതെന്നും ദേവീദാസന്റെ ഭാര്യ പറഞ്ഞു.
സാമ്പത്തിക വിഷയവുമായി ബന്ധപ്പെട്ട കേസ് ആണെന്ന് പറഞ്ഞാണ് പൊലീസ് ശംഖുംമുഖം ദേവീദാസനെ കൊണ്ടുപോയത്. കുട്ടി മരിച്ച വിവരം ഇതുവരെ അറിഞ്ഞിരുന്നില്ലെന്നും അവര് വ്യക്തമാക്കി.
അതേസമയം, കരിക്കകം സ്വദേശിയായ ജോത്സ്യന് ശംഖുമുഖം ദേവീദാസന് എന്ന പ്രദീപ് കുമാറിന്റെ വീട്ടില് അര്ധരാത്രി കഴിഞ്ഞും പൂജകള് നടക്കാറുണ്ടെന്ന് നാട്ടുകാര് പറയുന്നു.ജ്യോത്സ്യം പഠിക്കാനെന്ന് പറഞ്ഞ് നിരവധിയാളുകള് ഇവിടെ വരാറുണ്ട്. പ്രായമായവരാണ് കൂടുതലും എത്തുന്നത്.
ദുര്മന്ത്രവാദമടക്കം ഇവിടെ നടക്കാറുണ്ടെന്നും അയല്ക്കാര് ആരോപിക്കുന്നു. ശംഖുംമുഖം ദേവീദാസന് അയല്ക്കാരുമായി അധികം അടുപ്പം പുലര്ത്തിയിരുന്നില്ല.
