ന്യൂഡല്ഹി : ഇന്ത്യയും ചൈനയും തങ്ങളുടെ ആഭ്യന്തരകാര്യങ്ങളില് ഇടപെടുന്നുവെന്ന കാനേഡിയന് സര്ക്കാര് രൂപീകരിച്ച അന്വേഷണ കമ്മീഷന്റെ റിപ്പോര്ട്ട് ഇന്ത്യ തള്ളി. വാസ്തവത്തില് ഇന്ത്യയുടെ ആഭ്യന്തര കാര്യങ്ങളില് നിരന്തരം ഇടപെടുന്നത് കാനഡയാണെന്നും ഇത് നിയമവിരുദ്ധ കുടിയേറ്റത്തിനും സംഘടിത കുറ്റകൃത്യത്തിനുമുള്ള പശ്ചാത്തലം സൃഷ്ടിച്ചുവെന്നും ഇന്ത്യന് വിദേശകാര്യമന്ത്രാലയം ചൂണ്ടിക്കാട്ടി. കാനഡയില് പ്രധാനമായും ഇടപെടലുകള് നടത്തുന്നതില് ചൈനയാണ് മുന്നിലെന്നും ഇന്ത്യ രണ്ടാം സ്ഥാനത്തുണ്ടെന്നുമാണ് അന്വേഷണ കമ്മീഷന് പറയുന്നത്. 2019 ലും, 2021 ലും കാനഡയില് നടന്ന തിരഞ്ഞെടുപ്പുകളില് വിദേശരാജ്യങ്ങള് ഇടപെട്ടിട്ടുണ്ടോ എന്നതുസംബന്ധിച്ച അന്വേഷണ റിപ്പോര്ട്ടാണ് ആ രാജ്യം പുറത്തുവിട്ടത്. ഇറാന്, റഷ്യ, പാകിസ്ഥാന് എന്നീ രാജ്യങ്ങളെയും റിപ്പോര്ട്ടില് കുറ്റപ്പെടുത്തുന്നുണ്ട്.
