പ്രയാഗ് രാജ് : മഹാകുംഭമേളയുടെ സുപ്രധാനദിനമായ മൗനി അമാവാസി ദിനത്തില്‍ ത്രിവേണി സംഗമത്തില്‍ അമൃതസ്നാനത്തിനിടയിലുണ്ടായ തിക്കിലും തിരക്കിലും പെട്ട് മരിച്ചത് 30 പേര്‍. 60 പേര്‍ക്ക് പരിക്കുണ്ട്.
ഗ്രഹങ്ങള്‍ അസാധാരണമായ രീതിയില്‍ വിന്യസിക്കപ്പെടുന്നതിനാല്‍ ഭൂമിയിലേക്ക് ദേവലോകത്ത് നിന്നും ശക്തിപ്രവഹിക്കുന്ന ദിവസമായാണ് മൗനി അമാവാസ്യ ദിനത്തെ കാണുന്നത്. ഏകദേശം 10 കോടി പേര്‍ ഈ ദിനമായ ബുധനാഴ്ച അമൃതസ്നാനത്തിന് എത്തുമെന്നായിരുന്നു കണക്കുകൂട്ടല്‍. ഇത്രയും വലിയ മനുഷ്യസംഗമത്തിനിടയില്‍ ബുധനാഴ്ച പുലര്‍ച്ചെ രണ്ടര മണിക്കാണ് അപകടമുണ്ടായത്. ഈ അപകടത്തിന്റെ കാരണം സംബന്ധിച്ച് അന്വേഷണം നടന്നുവരികയാണ്.
കഴിഞ്ഞ ദിവസം പ്രതിപക്ഷ നേതാവും സമാജ് വാദി പാര്‍ട്ടി നേതാവുമായ അഖിലേഷ് യാദവ് ത്രിവേണി സംഗമത്തില്‍ മുങ്ങിക്കുളിക്കാനെത്തിയിരുന്നു. സ്നാനത്തിന് ശേഷം വാര്‍ത്താ ലേഖകരുമായി സംസാരിക്കുമ്പോള്‍ അദ്ദേഹം പറഞ്ഞത് മഹാകുംഭമേളയില്‍ ഒരുക്കങ്ങളും സജ്ജീകരണങ്ങളും കുറെക്കൂടി മെച്ചപ്പെടുത്താമായിരുന്നു എന്നാണ്. എന്തെങ്കിലും അപകടം ഉടനെ സംഭവിച്ചേക്കുമെന്ന് ചില കോണുകളില്‍ നിന്നും സംശയം ഉണര്‍ന്നിരുന്നു. ഏതാനും മാസങ്ങള്‍ക്ക് മുന്‍പ് ഉത്തര്‍പ്രദേശിലെ ഹത്രാസില്‍ ഭോലെ ബാബ എന്ന് വിളിക്കപ്പെടുന്ന നാരായണ്‍ സാക്കര്‍ ഹരിയുടെ ആശ്രമത്തില്‍ ദര്‍ശനത്തിനിടെ ഉണ്ടായ തിക്കിലും തിരക്കിലും പെട്ട് 121 ഭക്തര്‍ കൊല്ലപ്പെട്ടിരുന്നു. ഈ അപകടത്തിലും അഖിലേഷ് യാദവിന്റെ പങ്ക് സംശയിക്കപ്പെട്ടിരുന്നു. ഭോലെ ബാബയുമായി അടുത്ത ബന്ധം പുലര്‍ത്തുന്ന നേതാവാണ് അഖിലേഷ് യാദവ്. അന്ന് അപകടമുണ്ടായ ഉടന്‍ ബോലെ ബാബ സത്സംഗില്‍ നിന്നും ഓടി രക്ഷപ്പെട്ടിരുന്നു. ഇതിന് സഹായിച്ചത് ഒരു പ്രതിപക്ഷപാര്‍ട്ടിയാണെന്ന് യോഗി സര്‍ക്കാര്‍ സംഭവത്തെക്കുറിച്ച് അന്വേഷിക്കാന്‍ രൂപീകരിച്ച പ്രത്യേക അന്വേഷണ സംഘം റിപ്പോര്‍ട്ടില്‍ ചൂണ്ടിക്കാട്ടിയിരുന്നു. അന്ന് 121 പേര്‍ കൊല്ലപ്പെട്ടിട്ടും അഖിലേഷ് യാദവ് മൗനം പാലിച്ചതും സംശയം വര്‍ധിപ്പിച്ചിരുന്നു. തിക്കുംതിരക്കും ഉണ്ടാക്കാന്‍ അന്ന് ശ്വാസംമുട്ടലുണ്ടാക്കുന്ന പുക സ്പേ ചെയ്തതായും റിപ്പോര്‍ട്ടുണ്ടായിരുന്നു.
മഹാകുംഭമേളയിലെ ത്രിവേണസംഗമസ്ഥാനത്തിനടത്തും ഇതുപോലെ സ്ത്രീകള്‍ക്ക് ശ്വാസം മുട്ടല്‍ അനുഭവപ്പെട്ടിട്ടുണ്ട്. ബാരിക്കേഡ് തകര്‍ന്നതിനെതുടര്‍ന്ന് രക്ഷപ്പെടാന്‍ ശ്രമിക്കുമ്പോള്‍ പല പുറത്തുകടക്കാനുള്ള വഴികളും അടഞ്ഞനിലയിലായിരുന്നു എന്നും ചില റിപ്പോര്‍ട്ടുകള്‍ ചൂണ്ടിക്കാട്ടുന്നു. പിന്നില്‍ ഒരു ഗൂഢാലോചന തള്ളിക്കളയാന്‍ കഴിയില്ലെന്നാണ് സംശയിക്കുന്നത്.
മഹാകുംഭമേളയുടെ ആരംഭ ദിനത്തില്‍ ഒരു ടെന്‍റിന് തീപിടിച്ചിരുന്നു. ഒരു ഗ്യാസ് സിലിണ്ടര്‍ പൊട്ടിത്തെറിച്ചായിരുന്നു തീപ്പിടിത്തം. ഈ അപകടത്തിന് പിന്നില്‍ തങ്ങളാണെന്ന് അവകാശപ്പെട്ട് ഒരു ഖലിസ്ഥാന്‍ സംഘടന രംഗത്തെത്തിയിരുന്നു.
