ന്യൂഡൽഹി : ഇന്ന് പുലർച്ചെ മഹാകുംഭ മേളയിൽ തിക്കിലും തിരക്കിലും പെട്ട് ഉണ്ടായ സംഭവത്തെ തുടർന്ന് പ്രധാനമന്ത്രി നരേന്ദ്ര മോദി ഉത്തർപ്രദേശ് മുഖ്യമന്ത്രി യോഗി ആദിത്യനാഥുമായി സംസാരിച്ചു. ഉടൻ തന്നെ അടിയന്തര സഹായ നടപടികൾ സ്വീകരിക്കണമെന്ന് അദ്ദേഹം യോഗിയോട് ആവശ്യപ്പെട്ടു.
കുംഭമേളയിലെ സ്ഥിതിഗതികൾ പ്രധാനമന്ത്രി നിരന്തരം നിരീക്ഷിക്കുകയും സംസ്ഥാന സർക്കാരുമായി നിരന്തരം ബന്ധപ്പെടുകയും ചെയ്യുന്നുണ്ട്. ഇതുവരെ മൂന്ന് തവണ അദ്ദേഹം മുഖ്യമന്ത്രിയുമായി സംസാരിച്ചുവെന്നും സ്ഥിതിഗതികൾ സാധാരണ നിലയിലാക്കാനും ദുരിതാശ്വാസ പ്രവർത്തനങ്ങൾ നടത്താനും നിർദ്ദേശങ്ങൾ നൽകിയിട്ടുണ്ടെന്ന് ഔദ്യോഗിക വൃത്തങ്ങൾ പറഞ്ഞു.
“കുംഭമേളയിലെ സ്ഥിതിഗതികളെക്കുറിച്ച് പ്രധാനമന്ത്രി മോദി യോഗി ജിയോട് സംസാരിച്ചു, സംഭവവികാസങ്ങൾ അവലോകനം ചെയ്തു, അടിയന്തര സഹായ നടപടികൾ സ്വീകരിക്കണമെന്ന് ആവശ്യപ്പെട്ടു,”- ഒരു ഉദ്യോഗസ്ഥൻ പറഞ്ഞു.
ഇന്ന് പുലർച്ചെ മഹാകുംഭത്തിൽ തിക്കിലും തിരക്കിലും പെട്ട് നിരവധി പേർക്ക് പരിക്കേറ്റതായി ഉദ്യോഗസ്ഥർ പറഞ്ഞു. ഇവർക്ക് അടിയന്തര സഹായം ഉറപ്പാക്കായും ചെയ്തതായും ഉദ്യോഗസ്ഥർ വ്യക്തമാക്കി.
സംഭവത്തിന്റെയും ജനക്കൂട്ടത്തിന്റെ നിരന്തരമായ വർദ്ധനവിനെയും കണക്കിലെടുത്ത് ഭരണകൂടം അഖാഡകളോട് അവരുടെ ആചാരപരമായ കുളികൾ താൽക്കാലികമായി മാറ്റിവയ്ക്കാൻ അഭ്യർത്ഥിച്ചിട്ടുണ്ട്.
