പാലക്കാട്:നെന്മാറയില് കൊലക്കേസ് പ്രതി ചെന്താമര ജാമ്യത്തിലിറങ്ങി വെട്ടിക്കൊലപ്പെടുത്തിയ സുധാകരന്റെയും അമ്മ ലക്ഷ്മിയുടെയും സംസ്കാര ചടങ്ങുകള് നടന്നു.മൃതദേഹങ്ങള് വീട്ടിലെത്തിച്ചപ്പോള് സഹോദരങ്ങളും മക്കളും അലമുറയിട്ട് കരഞ്ഞത് കണ്ടു നിന്നവരെയും കരയിച്ചു.
സുധാകരന്റെ മക്കളായ അതുല്യയുടെയും അഖിലയുടെയും കരച്ചില് കണ്ടുനില്ക്കാന് കഴിയുന്നതായിരുന്നില്ല. നെന്മാറ വാക്കാവ് ശാന്തിഗൃഹം ശ്മശാനത്തിലായിരുന്നു ലക്ഷ്മിയമ്മയുടെ സംസ്കാരം. സുധാകരന്റെ മൃതേദഹം എലവഞ്ചേരിയിലെ ശ്മശാനത്തില് സംസ്കരിച്ചു.
കൊലക്കേസ് പ്രതിയായ ചെന്താമര ഇരുവരെയും വെട്ടിക്കൊലപ്പെടുത്തിയത് ഇന്നലെ രാവിലെയാണ്. സുധാകരന്റെ ഭാര്യ സജിതയെ 2019 ല് ചെന്താമര വെട്ടിക്കൊലപ്പെടുത്തിയിരുന്നു. ഈ കേസില് ശിക്ഷിക്കപ്പെട്ട ഇയാള് ജാമ്യത്തിലിറങ്ങിയാണ് ഇന്നലെ വീണ്ടും കൊലപാതകം നടത്തിയത്.
കൊലപാതകത്തിന് ശേഷം ഒളിവില് പോയ പ്രതിയെ ഇതുവരെയും കണ്ടെത്താന് കഴിഞ്ഞിട്ടില്ല. പ്രതി നേരത്തെ ഒളിച്ചിരുന്ന അറക്കമല, പട്ടിമല എന്നിവിടങ്ങളില് തെരച്ചില് നടത്തിയെങ്കിലും ഫലമുണ്ടായില്ല. സംസ്ഥാനത്തിന് പുറത്തും അന്വേഷണം നടത്തുന്നുണ്ട്.
തെരച്ചിലിനായി ബുധനാഴ്ച കെഡാവര് നായ്ക്കളെ എത്തിക്കും. പ്രതിയുടെ ആത്മഹത്യാസാധ്യതയും പൊലീസ് അന്വേഷിക്കുന്നുണ്ട്.പ്രതിയുടെ വീട്ടില് നടത്തിയ തെരച്ചിലില് കൊലപ്പെടുത്താനുപോയോഗിച്ച കൊടുവാളും ഒപ്പം പകുതിയൊഴിഞ്ഞ വിഷക്കുപ്പിയും കണ്ടെത്തിയിരുന്നു. പ്രതിക്കായി കായലും കുളവുമുള്പ്പെടെയുള്ള സ്ഥലങ്ങളില് പൊലീസ് തെരച്ചില് നടത്തി. അതിനിടെ കോഴിക്കോട് തിരുവമ്പാടിയില് ചെന്താമരയുടെ മൊബൈല് ഓണായെന്ന വിവരം ലഭിച്ചിരുന്നു. ഇതും അന്വേഷിക്കുന്നുണ്ട്.
